Janubiy Koreyada komaga tushgan o‘zbekistonlik bo‘yicha shifoxona 93 ming dollar miqdorida hisob chiqargan

Ijtimoiy tarmoqlarda va ba'zi OAV tomonidan O‘zbekiston fuqarosi Abram Oqilov Koreya Respublikasining klinikalaridan birida og‘ir ahvolda bo‘lib turgani to‘g‘risidagi xabarlar tarqaldi. 

Bandlik va mehnat munosabatlari vazirligi xabariga ko‘ra, 22 fevral Tashqi mehnat migratsiyasi agentligining Janubiy Koreyadagi vakili Alisher Sulaymonov Kvandjuga jo‘nab ketgan. 

26 fevral kuni OAVda 8 oy mobaynida Seul shahri Novongu tumanidagi “Sanggi Pik Pionvon” shifoxonasida bo‘lib kelayotgan, 1996 yilda tug‘ilgan A.Oqilov to‘g‘risida xabarlar tarqaldi. 2019 yil 27 fevralda A.Sulaymonov shifoxonada bo‘lib, bemorni yo‘qladi va jabrlanuvchining akasi Aziz Oqilov bilan uchrashdi, deyiladi xabarda.      

Aniqlanishicha, A.Oqilov 2018 yil 27 iyunda o‘zi ishlagan plastik qurilish materiallari ishlab chiqaradigan sex direktori bilan sog‘lig‘idan shikoyat qilib shifoxonaga kelgan. Shifokorlar birinchi yordamni ko‘rsatishgan, ukol urishgan va shundan so‘ng A.Oqilov noma'lum sababga ko‘ra komaga tushib qolgan. Shifokorlar organizmga keskin kaliy yetishmasligi, shuning oqibatida asab tizimi, shuningdek, miyaning bir qismi ishdan chiqqanligi tashxisini qo‘yishgan. Ayni paytda A.Oqilovning holati og‘ir, ammo barqaror.

Uzoq davom etgan harakatsiz yotish oqibatida tananing turli qismlarida uyushiq jonsiz joylar paydo bo‘lgan va bu irish jarayoni boshlanishiga olib kelgan. Shifokorlar tanadagi shunday joylarni yo‘qotish bo‘yicha 4 ta operatsiya o‘tkazgan. 

Jabrlanuvchining akasi Aziz Oqilov kerakli ma'lumotlarni to‘plash va hujjatlarni tegishli organlarga topshirish uchun advokat yollagan. 31.12.2018 holatiga ko‘ra shifoxona 103 144 koreya voni (taxminan 93 000 AQSh dollari) miqdorida hisob chiqargan. 

“Biroq haligacha hech kim aybni zimmasiga olgani yo‘q va sug‘urta kompaniyasining maxsus Inspeksiyasi tomonidan tekshiruv ishlari olib borilmoqda, chunki vaziyatga oydinlik kiritilgungacha sug‘urta kompaniyasi kafil bo‘lib turibdi. Inspeksiya xulosasi taqdim etilgach, ish sudga oshiriladi va yakuniy qaror sud tomonidan chiqariladi”, - deyiladi vazirlik xabarida. 

Jabrlanuvchining akasi Aziz Oqilov yuz bergan hodisada aybdorni (shifoxona yoki ish beruvchi) aniqlashga ko‘maklashish, bandlik ruxsatnomasi tizimi bo‘yicha Koreyaga ishchi kuchini yuborish Memorandumi nusxasini olish, A.Oqilovning onasi va opasi uchun 3 oyga viza olish bo‘yicha yordam berishni so‘ragan.

Mazkur holat yuzasidan Tashqi mehnat migratsiyasi agentligi vakolatxonasi tomonidan quyidagi chora-tadbirlar rejasi ishlab chiqilgan:

ushbu masalaga oid tekshiruv ishlarida yordam ko‘rsatish murojaati bilan 2019 yil 5 fevralda Koreya Respublikasi Bandlik va mehnat vazirligiga yuborilgan 01/0-02/11-868-sonli xatga javob olish;

barcha masalalar hal bo‘lgunga qadar bemor A.Oqilovning holidan muntazam xabar olib turish;

bemorning onasi va opasi uchun Koreyaga kirish vizasini olishda yordam ko‘rsatish maqsadida O‘zbekistondagi Koreya Respublikasi elchixonasiga xat yozish;

ish beruvchidan badal puli, shuningdek, A.Oqilov ish haqining to‘lanmay qolgan qismini olish masalasini hal etish;

A.Oqilovning advokati bilan uchrashib, masalani muhokama qilish, masalani hal etishda har qanday yordam ko‘rsatish. 

sug‘urta kompaniyasi vakillari bilan uchrashib, davolanish uchun sarflangan xarajatlarni (bugungi kun holati bo‘yicha davolanish xarajati 93 000 AQSh dollarni tashkil etmoqda) qoplash masalasini muhokama qilish;

sug‘urta kompaniyasining tekshiruv natijalarini olish;

fuqaroni vataniga transportirovka qilish uchun tibbiyot muassasasi ruxsatini olish (bugungi kunda bemor hayotni sun'iy saqlab turish qurilmasi ostida bo‘lgani sabab, uni transportirovka qilib bo‘lmaydi);

fuqaro A.Oqilovning vataniga maxsus transportirovkasini ta'minlash;

A.Oqilovning O‘zbekiston Respublikasi hududida davolanishini ta'minlashda yordam ko‘rsatish.

Ta'kidlanishicha  vaziyatni bandlik va mehnat munosabatlari vaziri Sh.Kudbiyev nazorat qilib turibdi.   

Eslatib o‘tamiz, avvalroq TIV Janubiy Koreyada komaga tushgan o‘zbekistonlik migrant haqidagi ma'lumotga izoh bergandi.