O‘zbekistonga mahsulotlar olib kirilishi taqiqlangan davlatlar ro‘yxatini shakllantirish tartibi tasdiqlanadi

Normativ-huquqiy hujjatlar loyihalari muhokamasi portalida Vazirlar Mahkamasining “O‘zbekiston Respublikasi hududiga sanitariya-epidemiologik va fitosanitariya nazoratidan o‘tkaziladigan mahsulotlarning olib kirilishi taqiqlangan davlatlar ro‘yxatini shakllantirish hamda yangilash tartibini tasdiqlash haqida”gi qarori loyihasi joylashtirildi.

Hujjat bilan O‘zbekiston Respublikasi hududiga sanitariya-epidemiologik va fitosanitariya nazoratidan o‘tkaziladigan mahsulotlarni olib kirilishi taqiqlangan davlatlar ro‘yxatini shakllantirish hamda yangilash tartibi tasdiqlanishi mumkin.

Sog‘liqni saqlash vazirligi Vazirlar Mahkamasi huzuridagi O‘simliklar karantini davlat inspeksiyasi bilan birgalikda sanitariya-epidemiologiya, fitosanitariya holati nomaqbul bo‘lgan davlatlar ro‘yxatini shakllantiradi hamda ushbu ro‘yxat doimiy yangilanib borilishini ta'minlaydi.

Qayd etilishicha, mazkur tartib chetdan keltiriladigan mahsulotlarni xavfsizlik va gigiyenik ko‘rsatkichlari bo‘yicha muvofiqlikni baholash qoidalarini belgilaydi.

Mahsulotlarning har bir turi bo‘yicha muvofiqlikni baholash tartibi O‘zbekiston Respublikasi Adliya vazirligida ro‘yxatdan o‘tkaziladigan muvofiqlikni baholashning tegishli qoidalari bilan belgilanadi. Mahsulot xavfsizlik va gigiyenik ko‘rsatkichlari bo‘yicha majburiy tavsiflar texnik jihatdan tartibga solish sohasidagi normativ hujjatlarda belgilanadi.

Mazkur tartibning amal qilishi majburiy sanitariya-epidemiologik xulosalarni  rasmiylashtirishga tatbiq etiladi.

Muvofiqlikni baholashni amalga oshirish qoidaga ko‘ra, laboratoriya majmualari milliy akkreditatsiya tizimida akkreditatsiyadan o‘tgan hududiy davlat sanitariya-epidemiologiya nazorati markazlari tomonidan sanitariya-epidemiologik xulosa rasmiylashtirilishini o‘z ichiga oladi.

Mahsulotning muvofiqligini baholash xulosalarini rasmiylashtirish va berish muddati barcha zarur hujjatlar taqdim etilgan vaqtdan boshlab o‘n besh kundan oshmasligi lozim.

Respublika aholisini o‘ta xavfli va yuqumli kasalliklardan muhofaza qilish, insonlarning hayoti va sog‘lig‘ini muhofaza qilish, yuqumli kasalliklarni kirib kelishi, tarqalishini oldini olish, Jahon Sog‘liqni saqlash tashkilotining o‘ta xavfli yuqumli kasalliklar bo‘yicha noxush epidemik davlatlar statistik ma'lumotini inobatga olgan holda, O‘zbekiston Respublikasi hududiga o‘ta xavfli va  yuqumli kasalliklar olib kirilishidan muhofaza qilish, aholining sanitariya epidemiologik osoyishtaligini, davlat sanitariya-epidemiologik xizmati nazorati ostidagi oziq-ovqat mahsulotlarining xavfsizligini ta'minlash, mamlakatimiz hududiga chetdan o‘ta xavfli va  yuqumli kasalliklari kirib kelishini oldini olish maqsadida O‘zbekiston Respublikasi Bosh davlat sanitariya vrachi taklifiga asosan Respublika epidemiyaga qarshi kurash favqulotda komissiyasining yig‘ilish bayoni qaroriga asosan sanitariya-epidemiologik nosog‘lom davlatlardan davlat sanitariya-epidemiologik xizmati nazorati ostidagi tovarlarni olib kirilishiga nisbatan vaqtincha cheklov qo‘yiladi.

Sanitariya-epidemiologik nosog‘lom deb topilgan davlatlarda odamlar uchun o‘ta xavfli yuqumli bo‘lgan kasallik o‘choqlari tugatilib, belgilangan muddatlar o‘tganidan so‘ng, shuningdek zarur epidemiyaga qarshi chora - tadbirlar o‘tkazilganidan keyin davlat sanitariya-epidemiologik xizmati nazorati ostidagi tovarlarni olib kirilishiga nisbatan qo‘yilgan vaqtincha cheklovlar O‘zbekiston Respublikasi Bosh davlat sanitariya vrachining taklifiga asosan Respublika epidemiyaga qarshi kurash favqulodda komissiyasining yig‘ilish bayoni qaroriga asosan bekor qilinadi.

O‘zbekiston Respublikasi hududiga olib kirilishi taqiqlangan karantin ostidagi mahsulotlar va ularning tarqalish hududlari ro‘yxatini O‘zbekiston Respublikasi Vazirlar Mahkamasi huzuridagi O‘simliklar karantini davlat inspeksiyasi O‘zbekiston Respublikasi Vazirlar Mahkamasi bilan kelishgan xolda tasdiqlaydi.

O‘zbekiston Respublikasi hududiga o‘simliklar karantini obektlari kirib kelishi va tarqalishining oldini olish maqsadida, qonunchilikda belgilangan tartibda O‘zbekiston Respublikasi hududiga olib kirilishi taqiqlangan karantin ostidagi mahsulotlar va ular tarqalgan davlatlarga vaqtinchalik cheklovlar o‘rnatiladi.

O‘zbekiston Respublikasi hududiga karantin ostidagi mahsulotlar olib kirilishiga qo‘yiladigan vaqtinchalik cheklovlar, karantin ostidagi mahsulot partiyalari ishlab chiqarilgan va tayyorlangan ma'lum bir xorijiy davlat yoki bir guruh xorijiy davlatlar, mazkur davlatlarning ayrim hududlari yoki ularning hududlarida joylashgan korxonalarga nisbatan qo‘llanilishi mumkin.

O‘zbekiston   Respublikasi   hududiga  mazkur  tartibda ko‘rsatilgan karantin ostidagi mahsulotlar olib kirilishiga vaqtinchalik cheklovlar o‘rnatilgan bo‘lsa, hamda shu karantin ostidagi mahsulot partiyalariga eksport uchun fitosanitar sertifikat cheklov o‘rnatilgan davr mobaynida olingan bo‘lsa, yuqoridagi karantin ostidagi mahsulotlarning olib kirilishi taqiqlanadi.

O‘zbekiston Respublikasi hududiga, ma'lum bir davlatdan karantin ostidagi mahsulot olib kirilishiga vaqtinchalik cheklovlar o‘rnatish bo‘yicha qaror quyidagi holda qabul qilinadi:

O‘zbekiston Respublikasi davlat chegara maskanlarida fitosanitar nazorati o‘tkazilishi natijasida mazkur bandning qismida ko‘rsatilgan xorijiy davlat yoki bir guruh xorijiy davlatlardan (ularning ma'lum bir hududida yoki zararlangan hududda joylashgan tashkilotda ishlab chiqarilgan) olib kirilayotgan karantin ostidagi mahsulotlarda tizimli (doimiy) ravishda o‘simliklar karantini obektlari aniqlanganda.

O‘zbekiston Respublikasi hududiga ma'lum bir karantin ostidagi mahsulot olib kirilishiga o‘rnatilgan vaqtinchalik cheklovlar to‘g‘risidagi qarorda, mazkur cheklovlar kuchga kirishi va amal qilishi muddatlari ko‘rsatilishi shart.

Mazkur tartibda nazarda tutilgan hollarda, vaqtinchalik cheklovlar kiritilishi sabablari bartaraf etilguniga qadar, vaqtinchalik cheklovlar to‘g‘risidagi qaror belgilanmagan muddatga qabul qilinishi mumkin.

O‘zbekiston Respublikasi hududiga ma'lum bir karantin ostidagi mahsulot olib kirilishiga o‘rnatilgan vaqtinchalik cheklovlar to‘g‘risidagi qaror qabul qilingan kundan boshlab bir kunlik muddatda Inspeksiyaning www.karantin.uz rasmiy veb-saytida joylashtiriladi.

O‘zbekiston Respublikasi hududiga, ma'lum bir karantin ostidagi mahsulot olib kirilishiga o‘rnatilgan vaqtinchalik cheklovlarni bekor qilinishi to‘g‘risidagi qaror faqatgina vaqtinchalik cheklov o‘rnatilgan davlatning o‘simliklar karantini xizmati tomonidan rasmiy ravishda taqdim etilgan ma'lumotlar asosida, Inspeksiya tomonidan o‘tkazilgan fitosanitar xavf tahlili jarayoni yakuni bo‘yicha qilingan xulosa asosida qabul qilinadi.

Vaqtinchalik cheklov olib tashlangan davlatlardan Respublika hududiga olib kiriladigan oziq-ovqat mahsulotlariga, ularni ishlab chiqarish vositalariga sanitariya-epidemiologik xulosa rasmiylashtirib berish tartibi O‘zbekiston Respublikasi Vazirlar Mahkamasining 2004 yil 6 iyuldagi 318-sonli qarori bilan tasdiqlangan “Mahsulotlarni sertifikatlashtirish tartibi to‘g‘risidagi” Nizomga asosan amalga oshiriladi.

Bir tashqi savdo shartnomasi (kontrakt) doirasida chetdan olib kelinayotgan aynan bir xil turdagi faqat oziq-ovqat mahsulotlariga sanitariya-epidemiologik xulosa bir kalendar yilidan oshmagan muddatga rasmiylashtirib berilgan taqdirda, tashqi iqtisodiy faoliyat ishtirokchilari o‘z tovarlarini bojxona rasmiylashtiruvidan o‘tkazib, o‘z omborxonalariga joylashtirganlaridan so‘ng chetdan olib kelinayotgan aynan bir xil mahsulotlarning olib kelingan ikkinchi va undan keyingi to‘plari Davlat sanitariya-epidemiologiya nazorati markazining akkreditatsiyadan o‘tgan laboratoriya majmualarida akkreditatsiya sohasiga muvofiq shartnoma asosida qayta sanitariya-epidemiologik xulosa rasmiylashtirmagan holda mahsulotlarni xavfsizlik hamda gigiyenik ko‘rsatkichlarini aniqlash uchun tegishli laboratoriya tahlillari o‘tkazilishi joriy etiladi.