IIBB: Beruniy ko‘chasida yosh bolani urib yuborgan haydovchi qo‘lga olindi

12 aprel kuni soat 20.50 dan 21.00 gacha bo‘lgan vaqt oralig‘ida Shayxontohur tumani Beruniy ko‘chasidagi aviakassa qarshisida “Matiz” rusumli avtomobilni boshqarib borgan haydovchi 5 yoshli bolani urib yuborib, voqea joyidan yashiringan. 

IIBB xabariga ko‘ra, bola shifoxonada jon bergan. Dastlabki ma'lumotlarga ko‘ra, bola uyidan ruxsatsiz chiqib, serqatnov yo‘lni mustaqil kesib o‘tmoqchi bo‘lgan.

Haydovchi qo‘lga olinib, u – 27 yoshli I.I. ekanligi ma'lum bo‘ldi. Sodir bo‘lgan yo‘l-transport hodisasidan so‘ng u o‘z avtomobilini Ko‘kcha masjidi yaqinidagi mahallada qoldirib, yashirinishga uringan vaqtda qo‘lga olingan.

Qayd etilishicha, hozirda tergovoldi tekshiruvi olib borilmoqda.