17:10 / 06.06.2019
20781
Соғлиқни сақлаш вазирлиги Тошкентдаги овқатдан заҳарланиш ҳолати бўйича қўшимча маълумот берди

Соғлиқни сақлаш вазирлиги Тошкентдаги оммавий овқатдан заҳарланиш ҳодисаси бўйича қўшимча маълумотлар бериб, беморларнинг аҳволи яхшиланиб бораётганини маълум қилди.

«4 июнь куни соат 17:00дан 6 июнь соат 17:00га қадар ЎзР ССВ Эпидемиология, микробиология ва юқумли касалликлар илмий текшириш институти (ЎзРССВ ЭМЮКИТИ) шифохонасига 12 нафар, Тошкент шаҳар 5-сон юқумли касалликлар шифохонасига 2 нафар ва 2-сон юқумли касалликлар шифохонасига 1 нафар, жами 15 нафар бемор кўнгил айниши, қайт қилиш, бош оғриши, умумий ҳолсизланиш, ич кетиши, ошқозон соҳасида оғриқ, тана ҳароратининг кўтарилиши каби шикоятлар билан мурожаат қилган.

Беморларнинг 11 нафари аёл (шундан 3 нафари 2009, 2012 ва 2014 йилларда туғилган қиз болалар) ва 4 нафари эркак. Улар тиббий кўрикдан ўтказилиб, «Овқат токсикоинфекцияси» бирламчи ташхиси билан шифохоналарга ётқизилган.

Шифокорларнинг самарали даволаш муолажаларидан сўнг беморларнинг аҳволи яхшиланмоқда», Соғлиқни сақлаш вазирлиги жамоатчилик билан алоқалар бўлимининг Kun.uz’га берган хабарида.

Бундан аввалроқ, вазирлик Тошкентда 15 киши овқатдан заҳарлангани ва уларнинг 3 нафарининг аҳволи оғирлиги, улар Тошкентнинг Сергели туманидаги «Оқтепа лаваш» умумий овқатланиш шохобчасида товуқли сэндвичини истеъмол қилиш оқибатида ўзини нохуш сезиб, шифокорларга мурожаат қилгани ҳақида хабар берганди.

Top