8584.5 USD +6.14

9673.87 EUR +45.52

136.34 RUB +1.82

10793.3 GBP +50.61

08:15 / 16.06.2019 6460

ОАВ Лондон Форс кўрфазига 100 нафар махсус жангчи юборишидан хабар топди

Фото: ISNA / AP

Буюк Британия Уммон кўрфазида иккита нефть танкери ҳужумга учрагандан кейин ушбу ҳудудда ўз кемалари ҳимоясини кучайтирмоқчи. Бу мақсадда Қироллик ҳарбий-денгиз флоти Форс кўрфазига 100 нафар махсус жангчини юборади, деб хабар берди The Sunday Times нашри.

Нашрнинг ёзишича, Британиянинг Баҳрайнда 2018 йилда очилган ҳарбий-денгиз базаси тезкор кучлар бўлинмасини шакллантиради. Унинг таркибига Плимутда жойлашган 42-десант отряди аскарлари киради. Улар Форс кўрфазини патрулловчи кемаларда денгизга чиқиб, Британиянинг ҳарбий ва савдо кемаларини ракеталар, мина ва кичик кемалар ҳужумидан ҳимоялайди.

Таъкидланишича, 16 июнда жангчиларни юбориш режасини Британиянинг фавқулодда вазиятлар бўйича ҳукумат қўмитаси COBRA муҳокама қилади. Маълум қилинишича, Британия мудофаа вазирлиги Форс кўрфазида вазиятнинг кескинлашишидан қочиш мақсадида миссия ҳақида эълон қилмаган.

13 июнда Уммон кўрфазида Front Altair ва Kokuka Courageous танкерлари ҳужумга учраганди. Кемаларда портлашлар содир бўлиб, шундан кейин ёнғин чиққан. Ҳеч ким жабрланмаган.

ОАВ юз берган воқеанинг эҳтимолий сабаблари сифатида мина портлаши ва торпедо ҳужумини келтирган. Кейинроқ Kokuka Courageous экипажи аъзолари танкерга мина эмас, “учар объект” шикаст етказганини маълум қилишган.

Воқеанинг кейинги куни АҚШ президенти Дональд Трамп ушбу воқеада Эронни айблаб чиққан. Британия ташқи ишлар вазири Жереми Хант ҳам ҳужумлар учун жавобгарлик айнан Эрон зиммасида эканлигига ишончи комиллигини айтган. Шундан кейин Ар-Риёд ҳам Теҳронга шундай айблов қўйган. Эрон эса барча айбловларни рад этмоқда.

Top