Bahriddin Isomov Toshkentda sud-psixiatriya ekspertizasidan o‘tmoqda - Bosh prokuratura

Yakkabog‘ tumani hokimining sanoatni rivojlantirish, kapital qurilish, kommunikatsiyalar va kommunal xo‘jalik masalalari bo‘yicha o‘rinbosari Mansur Tuymayevning hayotiga suiqasd qilganlikda ayblanuvchi tadbirkor Bahriddin Isomov ayni paytda Toshkentda sud-psixiatriya ekspertizasini o‘tmoqda. Bu haqda O‘zbekiston Bosh prokuratura matbuot xizmati Kun.uz’ga ma'lum qildi.

«Yakkabog‘ tumani hokimining sanoatni rivojlantirish, kapital qurilish, kommunikatsiyalar va kommunal xo‘jalik masalalari bo‘yicha o‘rinbosari Mansur Tuymayevning hayotiga suiqasd qilgani holati yuzasidan 20 iyul kuni Bahriddin Daminovich Isomovga nisbatan O‘zR JKning 25,97-moddasi 1-qismi bilan jinoyat ishi qo‘zg‘atilgan.

B.Isomovning himoya huquqi ta'minlanib, himoyachisi Sh.G‘oyirov ishtirokida gumon qilinuvchi tariqasida so‘roq qilingan. B.Isomov 21 iyul kuni JPKning 221-moddasi tartibda ushlanib, bu haqida yaqin qarindoshlariga ma'lum qilingan va qarindoshlari tomonidan olib kelingan kiyim-kechak va oziq-ovqat mahsulotlari bilan ta'minlangan. 

22 iyulda Isomovga ayb e'lon qilinib, qamoqqa olish tarzidagi ehtiyot chorasi qo‘llanilgan.

Ayblanuvchi qarindoshlari tomonidan taklif qilingan himoyachisi X.Jabborov bilan xoli uchrashishi uchun sharoit yaratib berilgan.

Shuningdek, ayblanuvchiga nisbatan sud-psixiatriya ekspertizasi tayinlanib, JIB Yakkabog‘ tumani sudining 22 iyuldagi ajrimi bilan statsionar tartibda sud-psixiatriya ekspertizasi o‘tkazish uchun Toshkent shahriga yuborilgan. 

22 iyul kuni B.Isomov turmush o‘rtog‘i Nodira Haydarova va o‘g‘li Sharofiddin Daminov bilan uchrashuv tashkil qilib berilgan», deyiladi Bosh prokuratura matbuot xizmati xabarida.

Eslatib o‘tamiz, 20 iyul kuni tadbirkor Bahriddin Isomov oldindan ogohlantirmasdan va tovon pulini to‘lamasdan kredit mablag‘lari hisobiga qurilgan ikki qavatli do‘kon va sex binosini buzmoqchi bo‘lgan hokim o‘rinbosari ustiga benzin sepib, o‘t qo‘yib yuborgan edi. 

Shu kuniyoq tuman prokuraturasi tomonidan Isomovga nisbatan Jinoyat kodeksining 25, 97-moddasi 1-qismi bilan jinoyat ishi qo‘zg‘atilgan va u tegishli protsessual tartibda ushlangandi.

Hokim o‘rinbosari esa shifoxonaga yotqizilgan, keyinroq u ishdan olinib, o‘z vakolatiga kirmaydigan xatti-harakatlarni amalga oshirgani sababli unga nisbatan Jinoyat kodeksining tegishli bandlari asosida jinoyat ishi qo‘zg‘atilgan. Hozirda tergov harakatlari olib borilmoqda.