25 avgust kuni Namangan viloyatining Uychi tumanida tibbiyot buyumlari ishlab chiqarishga ixtisoslashgan “Aks medikal farm” MChJ qo‘shma korxonasi ish boshladi. Bu yerda yiliga 100 million dona shprits, 300 ming dona ayollar tibbiyot oynasi ishlab chiqarish ko‘zda tutilgan. Bu haqda Namangan viloyati hokimligi axborot xizmati xabar berdi.
Qurilish ishlari 2018 yil mart oyida boshlangan “Aks medikal farm” korxonasi o‘z yo‘nalishida noyob loyiha hisoblanadi. Ishlab chiqarish hajmi jihatidan respublikamizda Nukus shprits zavodidan keyin ikkinchi o‘rinda turadi.
“Bunyodkor Maxsudbek fayz” fermer xo‘jaligi tomonidan amalga oshirilgan ushbu loyihaning umumiy qiymati 2 million 300 ming AQSh dollari bo‘lib, shundan 630 ming dollari xitoylik sarmoyadorlarning to‘g‘ridan-to‘g‘ri investitsiyasidir.
“Aks medikal farm” korxonasida yillik ishlab chiqarilgan mahsulotlarning umumiy qiymati 40 milliard so‘mni tashkil qiladi.
Korxona to‘la quvvatda ishga tushishi bilan 100 ga yaqin mahalliy yoshlarning doimiy bandligi ta'minlanadi.
Ma'lumot o‘rnida, viloyatga joriy yilning birinchi yarmida 2017 yilga nisbatan 15 barobardan ko‘p investitsiya kirib kelishiga erishildi. (2017 yilda 7,5 million AQSh dollari, 2019 yilning dastlabki olti oyida 125 million AQSh dollari). Yil yakunida ushbu ko‘rsatkichni 400 million AQSh dollariga yetkazish rejalashtirilmoqda.
Yaqinda Namangan tumanidagi “Merrimed farm” korxonasida qiymati 25 million AQSh dollari bo‘lgan, 100 ziyod dori-darmonlar ishlab chiqarishga mo‘ljallangan yangi liniya ishga tushirilgandi.
