16:46 / 10.09.2019
0
24954
Ўзбекистон Республикасининг бош давлат санитария инспектори ва бош давлат санитария врачи тайинланди

Президентнинг 9 сентябрдаги «Ўзбекистон Республикасида санитария-эпидемиология хизмати тизимини тубдан такомиллаштириш чора-тадбирлари тўғрисида»ги Фармонига кўра, Соғлиқни сақлаш вазирлигининг санитария-эпидемиология назорати хизмати ташкилотилари ва уларнинг ҳудудий бўлинмалари негизида Ўзбекистон Республикаси Вазирлар Маҳкамаси ҳузурида Санитария-эпидемиология назорати давлат инспекцияси ва Соғлиқни сақлаш вазирлиги ҳузурида эса Санитария-эпидемиологик осойишталик агентлиги ташкил этилди.

Бугун, 10 сентябрь куни Соғлиқни сақлаш вазирлигида Ўзбекистон Республикаси Бош вазир ўринбосари Азиз Абдуҳакимов ва Соғлиқни сақлаш вазири Алишер Шодмонов иштирокида бўлиб ўтган тадбирда Ўзбекистон Республикаси Президентининг тегишли қарори билан Нурмат Сатиниязович Отабеков Санитария-эпидемиология назорати давлат инспекцияси бошлиғи – Ўзбекистон Республикасининг Бош давлат санитария инспектори, Баҳром Ибрагимович Алматов Санитария-эпидемиологик осойишталик агентлиги директори – Ўзбекистон Республикасининг Бош давлат санитария врачи этиб тайинлангани маълум қилинди.

Нурмат Отабеков
Баҳром Алматов

Соғлиқни сақлаш вазирлиги Жамоатчилик билан алоқалар бўлимининг телеграмдаги каналида хабар қилинишича, Нурмат Отабеков бугунги кунгача Эпидемиология, микробиология ва юқумли касалликлар илмий текшириш институти директори, Баҳром Алматов эса Республика Давлат санитария-эпидемиология назорати маркази бош врачи лавозимида ишлаб келаётган эди.

Ушбу хабарга фикрингизни билдиринг. Бунинг учун авторизациядан ўтишингиз керак!
Top