«O‘zbekistonda har 100ta oilaga 44ta avtomobil to‘g‘ri keladi» – Davstatqo‘m

Bugun, 30 sentabr kuni, Axborot va ommaviy kommunikatsiyalar agentligida Davlat statistika qo‘mitasi tomonidan «Aholi turmush darajasini baholashda tanlanma kuzatuvlarning o‘rni» mavzusida jurnalistlar ishtirokida anjuman o‘tkazildi. Unda respublika bo‘yicha o‘tkaziladigan uy xo‘jaliklari kuzatuvining natijalari, jumladan, aholining oziq-ovqat mahsulotlari iste'moli, ta'minlanganlik darajasi, yashash sharoitlari va boshqa indikatorlar e'lon qilindi.

Davlat statistika qo‘mitasi boshqarma boshlig‘i Jahongir Yo‘ldoshev uy xo‘jaliklari kuzatuv jarayoni natijalarini ma'lum qildi.

«Uy xo‘jaliklari kuzatuvi respublikaning barcha hududlarida bir yilda jami 10 mingta xonadonda tanlanma usulda o‘tkaziladi. Har oyda 834ta xonadonda o‘rganish obekti sifatida olinadi. Ulardan axborot olishda bizga quyi boshqaruv organlari (mahalla fuqarolar yig‘ini) yaqindan yordam berishadi. 2018 yilda respublika aholisining uzoq muddat foydalaniladigan buyumlar bilan ta'minlanishiga e'tibor qaratiladigan bo‘lsa, 100ta uy xo‘jaligida televizorlar – 155ta, elektr changyutgichlar – 55ta, yengil avtomobillar – 44ta, konditsionerlar – 35ta, uyali aloqa vositalari – 262ta to‘g‘ri kelishi kuzatilgan. Shuningdek, uy xo‘jaliklarining shaxsiy uy yoki kvartira bilan ta'minlanganlik darajasi 98 foizni tashkil etdi», deya uning so‘zlarini keltirmoqda Kun.uz muxbiri.

Yo‘ldoshevning qo‘shimcha qilishicha, 2018 yilda uy xo‘jaliklarining Internet tarmog‘iga ulanish imkoniyati 80,9 foizga teng bo‘ldi. Internetdan foydalanuvchi 10 yosh va undan katta shaxslarning ulushi 55,2 foizni, ulardan erkaklar 60,4 foizni, ayollar esa 50,2 foizni tashkil etadi.