16:22 / 17.10.2019
0
17553
Президент Деновдаги ҳарбий қисмда ҳарбий хизматчиларнинг ўқув фаолияти билан танишди

Ўзбекистон Республикаси Президенти, Қуролли Кучлар Олий Бош Қўмондони Шавкат Мирзиёев Денов туманидаги Жануби-ғарбий махсус ҳарбий округига қарашли ҳарбий қисмда бўлди.

Давлат раҳбарининг топшириғига мувофиқ, Ўзбекистон Республикаси Мудофаа вазирлиги барча ҳарбий қисм ва муассасаларининг штат туркумлари, шахсий таркиби тубдан такомиллаштирилмоқда. 

Мазкур ҳарбий қисм ҳам 2018 йилдан аралаш ҳарбий қисм таркибида фаолият юритмоқда. Бу ерда муддатли ҳарбий хизматчилар 21 йўналишда мутахассисликлар бўйича тайёрланади. 

Қисмда ҳарбий хизматчилар учун барча шарт-шароит яратилган. Жумладан, бир вақтнинг ўзида 500 нафардан ортиқ ҳарбий хизматчи амалий ва назарий машғулот ўташ имкони мавжуд 3 қаватли ўқув биноси, 6та ётоқхона, замонавий спорт мажмуаси, ошхона қурилди.

Президент илгари сурган 5та ташаббус асосида мазкур ҳарбий қисмда ҳам муайян ишлар амалга оширилмоқда. Танишув чоғида шу ҳақда маълумот берилди. Хусусан, ўқув биноларидаги компьютер хоналари, электрон кутубхонада ҳарбийларнинг замонавий билим ва илғор кўникмаларни эгаллаши, ўз устида мунтазам ишлаши учун барча имкониятлар яратилди. 

Мудофаа вазирлиги ва вилоят ҳарбий-маъмурий сектори томонидан ҳарбий хизматчиларнинг оила аъзоларига шарт-шароит яратиш мақсадида жорий йилда қисм ҳудудидаги ҳарбий шаҳарчада 64 хонадонли 4та кўп қаватли уй, нодавлат битта мактабгача таълим муассасаси қурилиб, фойдаланишга топширилди. 

Давлат раҳбари ҳарбий қисмдаги шароитлар, янги ташкил топган бўлинмалар, аскар ва ҳарбий хизматчиларнинг ўқув фаолияти билан танишди. 

Саф майдонида Олий Бош Қўмондонга муддатли ҳарбий хизматчиларнинг жанговар тайёргарлигига бағишланган кўргазмали машғулотлар намойиш этилди. Президент ҳарбий техника ва қурол-аслаҳалар намуналарини кўздан кечирди. 

Ҳарбийлар билан мулоқотда президентга Жануби-ғарбий махсус ҳарбий округига қарашли ҳарбий қисмларни замонавий техника ва қурол-аслаҳа билан таъминлаш, қўшинларнинг бошқарув тизимини такомиллаштириш бўйича чора-тадбирлар, ҳарбий хизматчилар ва уларнинг оила аъзоларини ижтимоий ҳимоя қилиш, мазкур қисмда жанговар ва ўқув-тайёргарлик жараёнини автоматлаштиришга доир лойиҳалар ҳақида маълумот берилди. 

«Ҳарбийлар халқимизнинг маънавий етук фарзандлари бўлиши керак. Бунинг учун шахсий таркибнинг маънавий етуклигини, ҳарбий хизматчиларнинг жанговар тайёргарлигини юксалтириш лозим. Сиз Амир Темур, Жалолиддин Мангуберди каби буюк аждодларимиз ворислари эканлигингизни доим ҳис қилиб, шунга муносиб хизмат қилсангиз, ёшларимиз ватанпарварлик, она юртга садоқат туйғуларини сизлардан ўрганади», – деди Шавкат Мирзиёев.

Президент аскар ва офицерларнинг жанговар шайлигини ошириш, яшаш ва дам олиш шароитини яхшилаш, уларни уй-жой билан таъминлаш борасидаги ишларни янада жадаллаштириш лозимлигини таъкидлади. Бунинг учун жойларда фаолият юритаётган ҳарбий командирлар, ҳарбий-маъмурий секторлар фаолиятини янада такомиллаштириш кераклиги қайд этилди.

Ҳарбий қурилиш тизимини такомиллаштириш, аскарларнинг маънавиятини ошириш бўйича дастур ишлаб чиқиш юзасидан топшириқлар берилди.

Ушбу хабарга фикрингизни билдиринг. Бунинг учун авторизациядан ўтишингиз керак!
Top