Oʻzbekistonda xizmat koʻrsatgan artist, teatr, kino va dublyaj aktrisasi Yodgora Ziyomuhamedova 74 yoshida vafoti etdi. Bu haqda Madaniyat vazirligi xabar berdi.

Yodgora Ziyomuhamedova 34 yildan ziyod Oʻzbekiston davlat yosh tomoshabinlar teatrida samarali ijod qilib, sahnada 100 ga yaqin turli obrazlarni yaratgan.

Uning «Qizil shapkacha»da Qizil shapka, «Zumrad va Qimmat»da Qimmat, «Farzandim jigarbandim»da Sanobar, «Sening taqdiring»da Nazira, «Yarash-yarash»da Pokiza, «Burgut»da Gulnur, «Birinchi muallim»da Oltinoy kabi obrazlari mashhur.

Aktrisa televideniye va kino sohalarida ham samarali ijod qilgan, xususan, 25 yil mobaynida bolalar uchun moʻljallangan «Oqshom ertaklari» koʻrsatuvini olib borgan.

Tahririyat marhumning oila aʼzolari va yaqinlari, shogirdlari, hamkasblari hamda sanʼat ahliga taʼziya izhor etadi.