Toshkent davlat stomatologiya instituti talabasi xalqaro olimpiada g‘olibi bo‘ldi

Ushbu olimpiadada 18ta yetakchi tibbiy oliy ta'lim muassasalari, jumladan, Volgograd davlat tibbiyot universiteti, Kuban davlat tibbiyot universiteti, Moskva davlat tibbiyot va stomatologiya universiteti, Birinchi Moskva Davlat Tibbiyot Universiteti, Kirov davlat tibbiyot universiteti, I.P.Pavlova nomidagi Ryazan davlat tibbiyot universiteti, Pyatigorsk tibbiyot va farmatsevtika instituti, Qozon davlat tibbiyot universiteti, Privoljye tibbiy tadqiqot universiteti, Boshqirdiston davlat tibbiyot universiteti, Qarag‘anda tibbiyot universiteti, Astana tibbiyot universiteti, Qozog‘iston-Rossiya tibbiyot universiteti, N.N.Burdenko nomidagi Voronej davlat tibbiyot universiteti, Buxoro, Samarqand va Andijon tibbiyot institutlari hamda Toshkent davlat stomatologiya institutidan vakillar qatnashdi.

O‘zbekiston davlat akademik rus drama teatrida bo‘lib o‘tgan tadbirni Sog‘liqni saqlash vaziri Alisher Shodmonov kirish so‘zi bilan ochib berdi.

Shuningdek, Oliy va o‘rta maxsus ta'lim vaziri o‘rinbosari Sarvarxon Buzrukxonov, Toshkent davlat stomatologiya instituti rektori Jasur Rizayev va mehmonlar xalqaro tanlovning ahamiyati haqida nutq so‘zladi.

Olimpiadada tibbiyot oliy ta'lim muassasalarining yuqori kurslarida tahsil olayotgan 5 nafar talabadan iborat jamoalari ishtirok etdi. Olimpiada terapevtik stomatologiya, ortopedik stomatologiya, xirurgik stomatologiya, bolalar stomatologiyasi va ortodontiya yo‘nalishlarida olib borildi. Tanlovni xalqaro tajribaga ega bo‘lgan olimlar baholab bordi.

«Ta'kidlash joizki, ushbu tanlovga yurtimiz nomidan qatnashgan Toshkent davlat stomatologiya instituti talabalari 2ta 1-o‘rin, 2ta 2-o‘rin, 1ta 3-o‘rin va 1ta mutlaq g‘olib ishtirokchi bilan eng yuqori o‘rinlarni egalladi. Ushbu institut talabasi Diyora Isanova xalqaro olimpiadaning mutlaq g‘olibasi bo‘ldi. Umumjamoa hisobida Kirov davlat tibbiyot universiteti va Kuban davlat tibbiyot universiteti yuqori o‘rinlarni egalladi.

Olimpiada doirasida shuningdek, tibbiyot muassasalarining taqdimotlari va konferensiyalari ham o‘tkazildi. Ushbu tadbir nafaqat talabalarning bilimlarini amalda sinab ko‘rish, balki xalqaro tajriba almashish imkoniyatini ham yaratdi», deyiladi Sog‘liqni saqlash vazirligi Jamoatchilik bilan aloqalar bo‘limi xabarida.