31 oktabr kuni Oliy Majlis Qonunchilik palatasining majlisi bo‘lib o‘tdi. Unda davlat dasturining 2019 yilning III choragida bajarilishi borishi yuzasidan Vazirlar Mahkamasining hisoboti tinglandi.
Majlisda deputat Abdurashid Abduqodirov 3-12 foizgacha maktablarda fizika, kimyo kabi fanlar uchun laboratoriyalar yo‘qligi, borlaridayam yetarlicha jihozlanmagani, shuningdek, parta va doskalar ta'minoti ham qoniqarli emasligini ta'kidladi. Deputatning so‘zlariga ko‘ra, oliy ta'lim muassasalariga qabul kvotalari ko‘paytirilgan bo‘lsa-da, universitet va institutlarning moddiy-texnik bazasi shunga moslashtirilmagan, ayrim OTM ikki smenada ishlagan taqdirda ham o‘qishga qabul qilingan talabalarni to‘la qamrab ololmaydi, talabalar turarjoylarining talabdan ancha kamligi ham talabalarning huquqlarini cheklamoqda.
«So‘nggi besh yil davomida davlat tomonidan ijtimoiy sohaga ajratilayotgan mablag‘lar ulushi 59 foizni tashkil qilardi. Biroq 2019 yilda ijtimoiy sohaga avvalgi yillarga nisbatan budjetdan eng kam mablag‘ ajratilgan. Hukumatning 9 oylik hisobotida 53,2 foizni tashkil etganini ko‘rish mumkin. 2019 yilda ta'lim sohasiga ajratilgan mablag‘lar yuqorida sanab o‘tilgan muammolarni hal etish uchun yetadimi? Yetarli bo‘lmasa, hukumat bu muammolarni qanday hal qilmoqchi? 2020 yil qanday prognoz ko‘rsatkichlari uchun qanaqa mablag‘lar ajratilyapti?», deya savol bilan yuzlandi Abdurashid Abduqodirov.
Bosh vazir o‘rinbosari Aziz Abduhakimov deputatning savoliga javob berarkan, davlat budjeti shu paytgacha Prezident qarori bilan tasdiqlangan bo‘lsa, bu yildan boshlab ilk bor Oliy Majlis tomonidan tasdiqlanayotganiga urg‘u qaratdi. Uning so‘zlariga ko‘ra, bundan buyon deputatlarning o‘zi budjet xarajatlarini ko‘rib, tasdiqlab beradi. Natijada bu qonun kuchiga ega bo‘lgan hujjatga aylanadi.
Bundan tashqari, budjetdagi har bir o‘zgarish, shuningdek, 10 foizdan ko‘p bo‘lgan xarajatlar deputatlarning roziligini olib, parlament bilan kelishgan holda amalga oshirilishi, xalqaro tajribadan kelib chiqib qilinayotgan bu ishlar juda katta qadam bo‘layotgani ta'kidlandi.
«Deputatimiz aytgan muammolar yillar davomida yig‘ilib qolgan, ularni bir kunda yoki bir yil ichida bu masalani hal qilish imkonsiz. Buyog‘iga 3 yillik budjet qabul qilinishi ham rejalashtirilyapti. 3 yillik reja asosida. Eng asosiy sohalarimiz bo‘yicha konsepsiyalar ishlab chiqilgan bo‘lib, ularda yuqorida ko‘tarilgan ko‘plab muammolar yechimini topgan. Uch yillik budjetga o‘tadigan bo‘lsak, Oliy Majlis Qonunchilik palatasi deputatlari uch yil davomida qaysi yilda qanday yo‘nalishdagi muammolar yechimini topishi bo‘yicha hukumat tomonidan taklif etilayotgan aniq rejalar bilan tanishishlari mumkin. Vazirlar Mahkamasi bu ishlar parlamentning qat'iy nazorati ostida amalga oshiradi», deya Aziz Abduhakimovning so‘zlarini keltirmoqda Kun.uz muxbiri.
