«Hududgazta'minot»: qishda gazga talab yozdagiga nisbatan 8 martagacha oshadi

Bugun, 13 oktabr kuni Axborot va ommaviy kommunikatsiyalar agentligida O‘zbekiston Respublikasi Energetika vazirligi tomonidan «O‘zbekiston Respublikasida elektr energetika tarmog‘ini yanada rivojlantirish va isloh qilish strategiyasi to‘g‘risida»gi qaror ijrosiga bag‘ishlangan matbuot anjumani o‘tkazildi.

Tadbirda ishtirok etgan «Hududgazta'minot» AJ raisi Bahodir Eshmuratov aholining gaz ta'minotiga oid ayrim raqamlarni aytib o‘tdi.

«Mamlakatimiz ehtiyoji uchun umumiy hisobda 40 mlrd. kubometr gaz yetkazib beriladi. Yaxshi bilamizki, eng katta iste'molchilar issiqlik elektrostansiyalari, ya'ni gaz orqali elektr energiyasi olinadi. Shu 40 mlrd kubometrning 10 mlrd kubometri aholi ehtiyojiga mo‘ljallangan. Ana shundan 6 mlrd kubometri isitish tizimlari uchun ishlatiladi.

Ya'ni qish mavsumida gazga bo‘lgan talab yozga nisbatan 8 martagacha oshadi. O‘rtacha 1 trln so‘mgacha mablag‘ isitish tizimlari uchun sarflanyapti», deya uning so‘zlarini keltirmoqda Kun.uz muxbiri.