Soliq kodeksiga qo‘shimcha kiritiladi. U yuridik shaxslarga imtiyozlar bo‘yicha

O‘zbekiston Respublikasining Soliq kodeksiga imtiyozlarga aloqador qo‘shimcha kiritilishi rejalashtirilyapti.

Tegishli qonun loyihasi jamoatchilik muhokamasi uchun e'lon qilindi. Unga ko‘ra, Soliq kodeksiga qator o‘zgartishlar kiritilishi mumkin.

Xususan, 158-modda (Yuridik shaxslardan olinadigan foyda solig‘i. Imtiyozlar) quyidagi mazmundagi 7-band bilan to‘ldiriladi:

“7) 2020 yil 1 yanvardan boshlab, to‘qimachilik, tikuv-trikotaj, charm-poyabzal va mo‘ynachilik sohalari korxonalarining foyda solig‘i bo‘yicha soliqqa tortiladigan bazasi yetti yil davomida teng ulushlarda zamonaviy tozalash va kanalizatsiya inshootlarini qurish bo‘yicha xarajatlar summasiga kamaytiriladi”.

168-modda (Jismoniy shaxslarga - O‘zbekiston Respublikasining norezidentlariga soliq solishning o‘ziga xos xususiyatlari) quyidagi mazmundagi 2-qism bilan to‘ldiriladi:

“2020 yil 1 yanvardan boshlab, “O‘zto‘qimachiliksanoat” va “O‘zcharmsanoat” uyushmalarining xorijiy konsultantlari, shuningdek, to‘qimachilik va tikuv-trikotaj, charm-poyabzal va mo‘ynachilik sohalari korxonalarida mehnat faoliyatini yuritayotgan xorijiy mutaxassislar O‘zbekiston Respublikasidagi daromad manbalari bo‘yicha jismoniy shaxslardan olinadigan daromad solig‘ini uning belgilangan stavkasidan 50 foiz miqdorida to‘laydi”.

269-modda (Yuridik shaxslarning mol-mulkiga solinadigan soliq. Imtiyozlar) 2-qismi quyidagi mazmundagi 6-band bilan to‘ldiriladi:

“6) 2020 yil 1 yanvardan boshlab, hisobot davri natijalari bo‘yicha yalpi tushumning umumiy hajmida tayyor tikuv-trikotaj mahsulotlarining eksporti 60 foizdan kam bo‘lmagan eksport ulushiga ega bo‘lgan korxonalar 2023 yil 1 yanvarga qadar mol-mulk solig‘ini to‘lashdan ozod etiladi”.