2020 yildan «Ochiq ma'lumotlar global indeksi» xalqaro reytingiga O‘zbekiston ham kiritiladi

2018 yilning may oyidan boshlab, O‘zbekiston Xalqaro valuta jamg‘armasining kengaytirilgan ma'lumotlarni tarqatish umumiy tizimiga ulangan bo‘lib, unga ko‘ra 24ta kategoriya bo‘yicha 422ta indikator e'lon qilinib kelmoqda.

2020 yildan boshlab esa «Ochiq ma'lumotlar global indeksi» va «Ochiq ma'lumotlar barometri» xalqaro reytinglarida ham O‘zbekistonning ishtiroki ta'minlanadi.

Bu haqda 12 noyabr kuni o‘tkazilgan parlament eshituvida so‘z bordi, deb xabar bermoqda Kun.uz muxbiri.

Davlat statistika qo‘mitasi raisi Bahodir Begalovga ko‘ra, 2020 yilda ma'lumotlarni tarqatish maxsus standartiga o‘tish borasida «Yo‘l xaritasi» ishlab chiqilib, uning ijrosini ta'minlash choralari ko‘rilmoqda. 2021 yil 1 yanvardan Makroiqtisodiy ko‘rsatkichlar ma'lumotlarini tarqatish maxsus standartiga o‘tilishi rejalashtirilgan.

«Keyingi uch yilda statistika tizimida 6ta yo‘nalishda 17ta kompleks chora-tadbir amalga oshirilishi ko‘zda tutilgan. Xususan, tizimga Jahon milliy hisoblar tizimi metodologiyasini joriy etish va «Statistikani rivojlantirish milliy strategiyasi»ni qabul qilish, shuningdek, ochiq ma'lumotlar portalini takomillashtirish shular jumlasidandir», – dedi Begalov.

Parlament eshituvida deputatlar statistik ma'lumotlarning haqqoniyligi va ochiqligini ta'minlash, ularni jahon standartlariga moslashtirish masalalariga e'tibor qaratdi. Xususan, ma'lumotlar ochiq va haqqoniy bo‘lmas ekan, ular dunyo ommaviy axborot vositalarida e'lon qilinmas ekan, mamlakatda qulay investitsiyaviy muhitni yaratish, chet el sarmoyadorlarini jalb etish qiyin kechishi ta'kidlandi.

Savol-javob va muhokamalar chog‘ida, shuningdek, O‘zbekiston Respublikasining Xalqaro valuta jamg‘armasi tomonidan ishlab chiqilgan Ma'lumotlarni tarqatish maxsus standartiga o‘tishi yuzasidan 2019-2020 yillarga mo‘ljallangan «Yo‘l xaritasi»ning to‘liq ijrosini ta'minlash, davlat statistika hisoboti shakllari bo‘yicha hisobotlarni onlayn rejimda topshirish imkoniyatini beruvchi maxsus dasturiy ta'minotni bosqichma-bosqich  amaliyotga joriy etish lozimligi qayd etildi.

2020 yildan O‘zbekiston Respublikasining «Ochiq ma'lumotlar global indeksi» va BOchiq ma'lumotlar barometri» xalqaro reytinglarida ishtirokini ta'minlash choralarini ko‘rish kerakligi ta'kidlandi.

Parlament eshituvi yakunida Davlat statistika qo‘mitasining mamlakatda statistik ma'lumotlarning haqqoniyligi, ishonchliligi va ochiqligini ta'minlash yo‘nalishidagi faoliyatini jonlantirish, sohaga doir qonun hujjatlarini takomillashtirish yuzasidan bir qator taklif va tavsiyalar berildi.