10 dekabr kuni «Demokratik debat» tok-shousida ichki va tashqi migratsiya, mehnat muhofazasi va migrantlarning pensiya ta'minoti masalalari muhokama qilindi.
Muhokama davomida Kun.uz muxbiri o‘zbekistonlik migrantlar ishtirokida yuzlab avtohalokatlar sodir bo‘layotgani, ularning xavfsiz havo xizmatidan foydalanishiga esa samolyot chiptalari qimmatligi, loukosterlarning bozorga kirishiga qarshilik qilinayotganini aytib, siyosiy partiyalar vakillaridan sohadagi monopoliyani yo‘qotish borasida aniq takliflar so‘radi.
Baxtiyor Ruhiddinov, O‘zbekiston liberal demokratik partiyasi vakili:
– Biz temir yo‘l va havo xizmati ko‘rsatishdagi monopoliyani tugatish bo‘yicha va bu borada xorijiy investitsiyalarni, davlat xususiy sherikchiligini rivojlantirish tarafdorimiz.
Partiyamiz ko‘proq xorijiy aviakompaniyalarni O‘zbekistonga jalb qilish orqali chiptalar narxini tushirish va ko‘rsatiladigan xizmat sifatini oshirishni taklif qiladi.
Farhod Ishanqulov, «Adolat» sotsial demokratik partiyasi vakili:
– Partiyamiz sohada monopoliyani tugatish va unga raqobat muhitini olib kirishni yoqlaydi. Bunday muhitni olib kirish uchun qonunchilikda raqobat muhitini aks ettirish, ya'ni xususiy sektorga ham ruxsat berish kerak.
Amaldagi qonunchiligimizda xususiy sektor kelib ishlashi uchun yetarli huquqiy asos yo‘q.
Nodirjon Muxtorov, «Milliy tiklanish» demokratik partiyasi:
– O‘zbekistonda samolyotlarga ishlatiladigan kerosinning 1 tonnasi narxi 1200 dollar, chet el aviakompaniyalari esa shu yoqilg‘ini 700 dollardan sotib oladi. O‘zbekistonda aeroportni ijaraga olish 20 ming dollar, Yevropada bu narx 3 ming dollar. Xo‘sh, muammo qayerda?
Chet el aviakompaniyalari O‘zbekistonga kelib ishlashi uchun hammaga teng sharoit yaratib berish kerak.
Ikkinchi taklif: Monopolistik faoliyatning bir nechta turi bor. Jinoyat kodeksida faqat 2ta faoliyat turi uchun jinoiy javobgarlik belgilangan. Qozog‘iston, Rossiya, Janubiy Koreya kabi davlatlarda 7ta monopolistik faoliyat turi uchun jinoiy javobgarlik belgilangan. Navbatdagi besh yillikda boshqa monopol faoliyat turlari uchun ham jinoiy javobgarlikni belgilash kerak.
