«Ko‘tarinki kayfiyatda o‘tgan tadbirda O‘zbekiston Respublikasi Prezidenti maslahatchisi Abdujabbor Abduvohidov, O‘zbekiston Respublikasi Bosh vazirining birinchi o‘rinbosari, O‘zbekiston boks federatsiyasi raisi Achilbay Ramatov, Jismoniy tarbiya va sport vaziri Dilmurod Nabiyev, O‘zbekiston Milliy olimpiya qo‘mitasi prezidenti Rustam Shoabdurahmonov, O‘zbekiston Respublikasi Prezidentining yoshlar, fan, ta'lim, sog‘liqni saqlash, madaniyat va sport masalalari bo‘yicha maslahatchisining birinchi o‘rinbosari, O‘zbekiston yoshlar ittifoqi Markaziy Kengashi raisi, senator Alisher Sa'dullayev, o‘zbek sporti faxriylari va keng sport jamoatchiligi, jurnalistlar va yuzlab muxlislar ishtirok etishdi.
Bokschimiz tantanali kutib olingach, asosiy tadbir Olimpiya shon-shuhrati muzeyida bo‘lib o‘tdi. Unda O‘zbekiston Respublikasi Bosh vaziri Abdulla Aripov ham ishtirok etib, qahramonimizga muhtaram Prezidentimizning tabrigini yo‘lladi.
- Murodjon va uning ota-onasiga, ustozlariga prezidentimiz Shavkat Miromonovichning tabrigini yo‘llashga ijozat bergaysiz. Yurtboshimiz bunday g‘alabadan juda ham xursand bo‘ldilar. Murodjon, sen professional boksda sakkizinchi jangdayoq ikki yo‘nalish bo‘yicha chempionlik kamarlarini qo‘lga kiritishdek vazifani uddalagan dunyodagi ikkinchi bokschi bo‘lding. Bunday ajoyib natija bilan seni tabriklayman. Namanganning Chustidan yetishib chiqqan mana shunday sodda va kamtarin inson ummon ortida O‘zbekiston nomini ulug‘lab, butun dunyoga o‘z vataniga bo‘lgan muhabbatini izhor qildi. Bu yil sport jamoatchiligini yana bir muhim sinov kutib turganini yaxshi bilamiz. Ishonamanki, Murodjonning mana shunday g‘alabasi qolgan sportchilarimizga yaqinlashib kelayotgan Tokio Olimpiadasida yanada kuch-g‘ayrat bag‘ishlaydi, – dedi Abdulla Aripov.
Shundan so‘ng O‘zbekiston Respublikasi Prezidenti Shavkat Mirziyoyevning Murodjon Ahmadaliyevni «O‘zbekiston iftixori» faxriy unvoni bilan taqdirlash haqidagi Farmoni o‘qib eshittirildi va ko‘rsatgan jasorati uchun bokschimizga Prezident sovg‘alari – Toshkent shahridan 3 xonali uy va «Tracker» avtomobilining kaliti ham topshirildi. O‘z navbatida, bokschimiz ko‘rsatilayotgan bunday e'tiborni kelajakda oqlashga va'da berdi va o‘z oldiga qo‘ygan maqsadlari haqida gapirib o‘tdi.
