YeI Falastinning bosib olingan hududlarini Isroilniki deb tan olish to‘g‘risidagi AQShning taklifini qabul qilmadi

Yevroittifoq Yaqin Sharqdagi vaziyatni barqarorlashtirish bo‘yicha tashabbus doirasida Iordan daryosining G‘arbiy qirg‘og‘idagi Isroil tomonidan bosib olingan Falastin hududlarini tan olish to‘g‘risidagi AQShning taklifini qabul qilmaydi. Bu haqda YeIning tashqi ishlar va xavfsizlik siyosati bo‘yicha oliy vakili Jozep Borrelning bayonotida ma'lum qilindi.

"Biz AQShning Iordan vodiysi va G‘arbiy sohildagi boshqa hududlarning anneksiyasi ehtimoli to‘g‘risidagi bayonotlaridan xavotirdamiz. Xalqaro me'yorlar va BMT Xavfsizlik kengashi rezolyutsiyalariga muvofiq, YeI Isroilning 1967 yildan keyin bosib olingan hududlar ustidan suverenitetini tan olmaydi", - deyiladi bayonotda.

28 yanvarda AQSh prezidenti Donald Tramp Falastin-Isroil mojarosini hal qilishga qaratilgan rejasini e'lon qildi. Ushbu rejadan Falastin hududida qurilgan yahudiy aholi maskanlarini Isroilniki deb tan olish, Quddusni Isroilning "bo‘linmas" poytaxti, Sharqiy Quddusni esa Falastin poytaxtiga aylantirish taklifi ham o‘rin olgandi. 

Isroil bosh vaziri Binyamin Netanyaxu bu tashabbusni qo‘llab-quvvatladi, Falastin yetakchisi Mahmud Abbos esa qat'iyan rad etdi.