Amerika yetakchisi o‘z murojaatnomasida xalqaro munosabatlar, sog‘liqni saqlash va iqtisodiyot haqida so‘z yuritdi. Quyida unda tilga olingan asosiy fikrlar keltirilmoqda.
Tashqi siyosat
· Eron yadro quroliga ega bo‘lishga urinishdan voz kechishi, terror, o‘lim va vayrongarchiliklar tarqatishni bas qilishi kerak. Agar bu amalga oshsa, Vashington qisqa muddat ichida Tehronga qarshi sanksiyalarni bekor qilishi va uning iqtisodiyotiga yordam berishi mumkin.
· O‘ldirilgan general Qosim Sulaymoniy "Eron rejimining eng shafqatsiz qassobi edi". U "dunyoning bosh terrorchisi" bo‘lib, Iroqdagi minglab harbiylar hamda "sanoqsiz erkaklar, ayollar va bolalarning" halok bo‘lishi va jarohatlanishida aybdor.
· IShID 100 foiz yo‘q qilindi, uning yetakchisi va asoschisi — "qonxo‘r qotil al-Bag‘dodiy" o‘lgan.
· AQSh Afg‘onistondan qo‘shinlarini olib chiqib ketish ustida ishlamoqda, chunki "Amerikaning eng uzoq davom etgan urushi"ga chek qo‘yish payti keldi. AQSh harbiylarining qat'iyati bu mamlakatda misli ko‘rilmagan rivojlanishga erishilishiga olib keldi va tinchlik muzoralari davom etmoqda.
· Jahon hamjamiyati Falastin-Isroil nizosiga barham berish uchun ijodiy yondashuvlar kerak. Mintaqadagi millionlab yoshlarga yanada yorqin kelajak uchun imkoniyat zarur.
· AQSh Venesuela, Nikaragua va Kubada "demokratiya tiklanishiga" harakat qilmoqda. "Maduroning razolati parchalab tashlanadi va yakson qilinadi", chunki Vashington "sotsialistik diktator"ga qarshi qaratilgan 59 davlatdan iborat diplomatik koalitsiyaga yetakchilik qilmoqda.
Iqtisodiyot
· Xitoy o‘nlab yillar davomida Qo‘shma Shtatlardan foydalanib keldi, ammo savdo kelishuvining birinchi bosqichi imzolanishi bunga chek qo‘ydi. Endi ikki mamlakat munosabatlari ularning butun tarixi davomidagi eng yaxshi munosabatlariga aylandi.
· Kanada va Meksika bilan endilikda USMCA deb atalayotgan Shimoliy Amerika erkin savdo hududi (NAFTA) to‘g‘risidagi kelishuvning qaytadan tuzilishi qariyb 100 mingta yangi ish o‘rni yaratadi hamda Amerika fermerlari va zavod ishchilari uchun eksport imkoniyatlarini sezilarli darajada oshiradi.
· Iqtisodiy pasayish davri tugadi. AQSh armiyasi butunlay qayta tashkil etildi, chegaralar himoyalangan, oilalar esa farovonlikda.
