Davomli tvitlarida Tramp Ukraina bo‘yicha yetakchi mutaxassis, Vakillar Palatasidagi impichment eshituvlari markazida turgan podpolkovnik Aleksandr Vindmanni telefon muloqoti to‘g‘risida «xato ma'lumot» yetkazgani haqida yozgan.
Yakunlangan haftada AQSh tarixida uchinchi marta mamlakatning amaldagi prezidentini impichment orqali lavozimidan chetlatishga urinish muvaffaqiyatsiz yakunlandi. Endi Tramp Oq uy ma'muriyatidagi kadrlarni qayta ko‘rib chiqishga kirishdi.
Impichment barbod bo‘ldi. Bu Donald Tramp va Amerika siyosati uchun nimani anglatadi?
Juma kuni AQShning Yevroittifoqdagi elchisi Gordon Sondland prezident uni Bryusseldan chaqirib olayotganini ma'lum qilgandi.
Undan bir necha soat avvalroq esa Oq uy xavfsizlik xizmati binodan podpolkovnik Aleksandr Vindmanni chiqarib yubordi.
Uning egizagi, shu vaqtgacha Milliy xavfsizlik kengashi qoshida katta yurist sifatida ishlab kelgan Yevgeniy Vindman ham ishini yo‘qotdi: uni ortga, AQSh armiya vazirligidagi ishiga qaytarishdi.
Tramp rasmiy bayonotida podpolkovnik Vindman to‘g‘risida salbiy munosabat bildirgan va Amerika telekanallari faoliyatini tanqid qilgan.
«Men uni umuman tanimaganman va hech qachon (bilishimcha!) uchrashmaganman, ammo u telefon muloqotlarim haqida ma'lumotni noto‘g‘ri yetkazib, itoatsizlik qildi. Boshlig‘i u haqida mutlaqo yomon tavsifnoma berdi, Vindmanda vaziyatni baholash, buyruqlarga bo‘ysunish va ma'lumotlarni sir saqlash bo‘yicha muammolar bor ekan. Boshqacha aytganda - «Yo‘qol», - deya yozgan Tramp.
Vindman nega kerak bo‘lmay qoldi?
O‘tgan yilning noyabrida podpolkovnik Vindman kongressda ko‘rsatma bergandi. O‘shanda u Tramp va Ukraina prezidenti Vladimir Zelenskiy o‘rtasida 2019 yilning 25 iyulida bo‘lib o‘tgan telefon suhbati tarkibidan tashvishda ekanini bildirgandi.
