13:36 / 26.02.2020
1
108902
Тож Маҳалдан суратлар: Трамп, Путин, Каримовлар, Мирзиёевлар ва бошқалар

Доналд Трамп Ҳиндистонга сафари чоғида дунёдаги энг гўзал масканлардан бири — Тож-Маҳал мақбарасини зиёрат қилди. 

Трамплар оиласи 24 февраль куни Тож Маҳални зиёрат қилди / Getty Images

АҚШ президенти мақбарани ҳинд маданиятининг гўзаллиги ва ранг-баранглиги намунаси деб атади ва йиллар давомида кўплаб машҳур шахслар имзолаган қайдлар китобида ўз дастхатини қолдирди.

Тож Маҳал XVII асрда Бобурийлар сулоласи вакили Шоҳ Жаҳон буйруғи билан қурилган. У ҳукмдорнинг рафиқаси, туғруқ пайтида вафот этган Мумтоз Маҳал хотирасига барпо этилган.

Унинг меъморий ечими шунчалик мураккаб ва ноёб бўлганки, минглаб қурувчилар томонидан 20 йилдан зиёд вақт давомида барпо этилган. Мақбара ва минораларнинг ҳамма жойи оқ мармар билан қопланган. Ёдгорлик ислом олами меъморчилигига хос тарздаги нақшлар ва Қуръон суралари билан безатилган.

Ушбу мақбара севги ва садоқат тимсоли ҳисобланади, кўпинча уни буюк севги саройи деб аташади.

Тож Маҳал дунёнинг етти мўъжизасидан бири саналади. 1983 йилда ЮНЕСКОнинг жаҳон мероси рўйхатига киритилган.

Оддий сайёҳлардан ташқари, Тож Маҳал фонида чет эллик сиёсатчилар, юлдузлар ва қироллик оилалари аъзолари мунтазам равишда суратга тушишади.

Тож Маҳалга йилига 4,5 миллион киши ташриф буюради. Улар орасида баъзи фотосуратлар алоҳида ажралиб туради. 

Ёлғиз малика

Малика Диана муҳаббат қасри олдида турмуш ўртоғисиз суратга тушганди / Getty Images

Малика Диананинг 1992 йил Тож Маҳал олдидаги ўриндиқда ёлғиз ўзи ўтирганида олинган ушбу суратда кўпчилик рамзий маънони кўради.

Малика ўшанда турмуш ўртоғи шаҳзода Чарльз билан Агра шаҳрида расмий ташриф билан бўлади. Лекин шаҳзода Чарльз иш билан банд эди ва малика Тож Маҳалга ёлғиз ўзи боради.

Маликанинг мухлислари учун ушбу фотосурат унинг никоҳда ўзини ёлғиз ҳис қилаётгани ҳақидаги сўзларининг тасдиғи эди.

Маҳаллий гидлар сайёҳларга ҳали ҳам «Диананинг ўриндиғини» кўрсатишади. 

Уильям ва Кейт

Уильям ота-онасига ўхшамади / Getty Images

Деярли чорак аср ўтгач, 2016 йилда Диананинг ўғли шаҳзода Уильям ва унинг рафиқаси Кейт ўша ўриндиқда суратга тушишди.

Уильям ва Кейтнинг вакили ўшанда шундай деганди: «Кембриж герцоги онасининг Ҳиндистонда қанчалик ҳурматга сазовор эканлигини билади ва унинг суратлари Тож Маҳалда намойиш этилганидан ва унинг хотираси сақланиб қолганидан жуда хурсанд».

Цукербергнинг ушалган орзуси

Марк Цукерберг ҳам Тож Маҳалга «лайк» босган / Getty Images

Facebook асосчиси Марк Цукерберг 2015 йилдаги Ҳиндистон сафарини Тож Маҳалдан бошлаган. Ўша пайтда у ўзининг ижтимоий тармоғида мақбарани кўришни бутун умр орзу қилгани ҳақида ёзган. 

«У мен кутганимдан ҳам гўзал. Одамлар нимани қуришга қодир эканлиги ва севги уларни бунга ундай олиши ҳайратланарли», — деган у. 

Муваффақиятсиз саммит

Покистоннинг собиқ президенти Парвиз Мушарраф рафиқаси билан / Getty Images

2001 йилда Покистоннинг ўша пайтдаги президенти Парвиз Мушарраф ва унинг рафиқаси Себҳа Ҳиндистон бош вазири Атал Биҳари Важпай билан учрашувлар доирасида Агра ва Тож Маҳалга ташриф буюришган. 

Давлат раҳбарлари икки мамлакат ҳам ўз ҳудуди деб ҳисоблайдиган Кашмир мақомини муҳокама қилишганди. 

Саммит дўстона баёнотлар билан бошланган, аммо ҳеч қандай натижа бермаган. Учрашув ҳануз Покистон ва Ҳиндистон ўртасида барқарор тинчликка эришиш йўлидаги бой берилган имконият сифатида баҳоланади. 

1966 йил селфиси

HARRISON FAMILY/PA

Афсонавий «The Beatles» гуруҳи мусиқачиси Жорж Ҳаррисон 1966 йилда Тож Маҳалга ташриф буюрганида 23 ёшда эди. 

Тараққиётда илгарилаб кетган новатор сифатида, Жорж севги мақбараси олдида селфига тушади — бу сўз ва тушунча кундалик ҳаётда пайдо бўлишидан анча олдин.

Тож Маҳалдан кейин Ҳаррисон Бомбейга (ҳозирги Мумбай), сўнг Деҳлига борган ва у ерда Ливерпуль тўртлиги қўшиқларида навоси янграган анъанавий ҳинд асбоби — ситарни сотиб олган.

Кремлдан мақбарага

Фото: Getty Images

2000 йил октябрь ойида Владимир Путин рафиқаси Людмила хоним билан Тож Маҳалга ташриф буюради.

Россия президентининг бу сурати унинг «нафис» жиҳатларини ҳам кўрсатган, дейишади.

Лекин 2013 йилда 30 йиллик турмушидан сўнг, Путин биринчи рафиқаси билан ажрашган.

Ҳиндистонда Россия президенти Деҳли ва Москва ўртасида стратегик ҳамкорлик декларациясини имзолаган ва шартномани тарихий қадам деб атаган.

Эйзенхауэр зирҳли машинасиз

Фото: Getty Images

1959 йилда Дуайт Эйзенхауер Ҳиндистонга расмий ташриф буюрган биринчи Америка президентига айланди. 

Президент Тож Маҳалга усти очиқ «Кадиллакда»да келади, уни маҳаллий аҳоли олқишлар билан қаршилаган.

Бош вазир Жаваҳорлал Неру ўша вақтда Эйзенхауэрнинг Ҳиндистон юрагини забт этгани ҳақида гапирганди.

Ўшандан бери замон тубдан ўзгарди. Трамп ташрифи давомида Агра шаҳри бутунлай беркитилди, Америка президентини «Йиртқич» лақабли зирҳли машина олиб юрди.

Каримовлар Тож Маҳалда

Фото: Каримов фонди

Ўзбекистоннинг биринчи президенти Ислом Каримов ҳам ўз президентлигининг илк даврида Ҳиндистонда бўлиб, Тож Маҳал олдида рафиқаси Татьяна Каримова билан бирга суратга тушганди.

Аввал Агра, кейин Деҳлига

Ўзбекистонликлар учун Тож Маҳал ўзгача аҳамиятга эга

Шавкат Мирзиёев рафиқаси Зироат Мирзиёева билан бирга 2018 йил 30 сентябрь куни Ҳиндистонга расмий ташрифи доирасида Тож Маҳал мажмуасига ҳам ташриф буюрганди. 

Мақбара зиёрати чоғида Қуръон тиловат қилинган, Шавкат Мирзиёев мажмуанинг фахрий меҳмонлар китобига дастхат ёзиб қолдирганди.

Бобурийлар мероси бўлган ушбу ёдгорлик ўзбек ва ҳинд халқларининг тарихи муштараклиги, икки мамлакат алоқалари мустаҳкам асосга эга экани ифодасидир.

Ушбу хабарга фикрингизни билдиринг. Бунинг учун авторизациядан ўтишингиз керак!
Top