Janubiy Koreyadagi fuqarolarni olib kelish uchun har hafta bir reys amalga oshiriladi

O‘zbekiston Respublikasi Tashqi ishlar vazirligi Koreya Respublikasi hududida bo‘lib turgan va ushbu davlatga borishni rejalashtirayotgan fuqarolarga murojaat qildi.

«COVID-19 koronavirusining O‘zbekiston hududiga kirib kelishi va tarqalishining oldini olish maqsadida mamlakatimiz Transport vazirligi Koreya Respublikasi aviatsiya idoralari va kompaniyalarini 2020 yilning 1 mart kunidan boshlab ikki mamlakat o‘rtasidagi aviaqatnovlarda vaqtinchalik cheklash choralari joriy qilinishi to‘g‘risida rasman xabardor qildi. 

Aviaqatnovlar soni haftasiga 1ta reysgacha qisqartiriladi. Janubiy Koreyadan O‘zbekistonga keluvchi yo‘lovchilar uchib kelishlari bilan 14 kun davomida karantinda bo‘lib turadi. 

Koronavirus tarqalishi bilan bog‘liq vaziyatning barqarorlashishi bilan ikki davlat o‘rtasidagi aviareyslar soni qayta tiklanadi», deyiladi vazirlik xabarida.

Eslatib o‘tamiz, 1 martdan boshlab Uzbekistan Airways aviakompaniyasi Janubiy Koreyada koronavirus avj olishi va O‘zbekiston hududida virus tarqalishining oldini olish maqsadida Seulga bo‘lgan qatnovlarni vaqtincha to‘xtatgan.

1 mart kuniga o‘tar kechasi Seuldan 182 nafar o‘zbekistonlik va 49 nafar xorijlik olib kelinib, Toshkent viloyati hududidagi maxsus hududda karantinga joylashtirildi.

Yuqoridagilardan kelib chiqqan holda TIV so‘nggi kunlar davomida koronavirusning tarqalishi bilan bog‘liq holat og‘irlashayotgan Koreya Respublikasi hududida bo‘lib turgan mamlakat fuqarolariga zarur holatlarda quyidagi raqamlari orqali murojaat qilishlari mumkinligini eslatib o‘tadi: 

- O‘zbekiston Respublikasining Koreya Respublikasidagi Elchixonasi: 
(+82) 2 574-65-54,  (+82) 2 577-36-60;

- Uzbekistan Airways AJ vakolatxonasi (aviachiptalar masalalari bo‘yicha): 
(+82) 10 8718-6850 (Ayubxon Abdullayev);

- O‘zbekiston Respublikasi Bandlik va mehnat munosabatlari vazirligi huzuridagi Tashqi mehnat migratsiyasi agentligining Kvandju shahridagi vakolatxonasi (mehnat migratsiyasi masalalari bo‘yicha): 
(+82) 10 8495-0027 (Odiljon Karimov).