O‘zbekistonda barqaror rivojlanish maqsadlariga erishish bo‘yicha harakatlar va majburiyatlar o‘n yilligiga start berildi

2 mart kuni O‘zbekistonda Barqaror rivojlanish maqsadlariga erishish bo‘yicha harakatlar va majburiyatlarni amalga oshirishga kirishilgani rasman e’lon qilindi. BMTning O‘zbekistondagi vakolatxonasi tashkil etgan tadbirda bu mavzu Oliy Majlis Senati va “Yuksalish” umummilliy harakati vakillari bilan birgalikda muhokama qilindi. Harakatlar o‘n yilligiga shu sanada rasman start berilishi bejiz emas, ya’ni 1992 yilning 2 mart kuni O‘zbekiston Respublikasi Birlashgan Millatlar Tashkilotining to‘laqonli a’zosiga aylangan. Asosiy maqsad  2030 yilga qadar Barqaror rivojlanish maqsadlariga erishish bo‘yicha ulkan harakatlarni boshlash hisoblanadi. 

Dasturni amalga oshirishga bag‘ishlangan tantanali tadbirda BMT missiyalarining rahbarlari, shu qatorda BMTning O‘zbekistondagi doimiy koordinatori, Qonunchilik palatasi deputatlari, Oliy Majlis Senati raisi va uning a’zolari, “Yuksalish” umummilliy harakati rahbari hamda jamoatchilik, yoshlar, fuqarolik jamiyati ishtirok etdi.

Yoshlar vakillari ma’ruzalarida ochlikka barham berish, gender tengligi, sog‘lom turmush tarzi va yana boshqa qator maqsadlarga erishish bo‘yicha amalga oshirilgan ishlar to‘g‘risida axborot berdilar. Bundan tashqari, ma’ruzachilar mehmonlarni 2030 yil so‘nggiga qadar barqaror rivojlanish maqsadlariga erishishda faol harakatlarni amalga oshirishga chorladilar.

Barqaror rivojlanish maqsadlari — kambag‘al, boy va rivojlanayotgan davlatlarning amaliy harakatlarni bajarishga bo‘lgan chorlovidir. Ular sayyoramizning farovonligi va himoyasini yanada yaxshilashga qaratilgan. Dunyo mamlakatlari qashshoqlikni tugatish choralari iqtisodiy o‘sishni kuchaytirish va ta’lim, sog‘liqni saqlash, ijtimoiy himoya va bandlik, shuningdek, iqlim o‘zgarishi atrof-muhitni muhofaza qilish sohalaridagi bir qator muammolarni hal etish bo‘yicha sa’y-harakatlarni birgalikda qabul qilinishi zarurligini tan olmoqdalar.

Barqaror rivojlanish maqsadlariga erishish uchun o‘n yil qoldi. Harakatlar o‘n yilligi dunyodagi barcha jiddiy muammolar, jumladan qashshoqlik va gender muammolaridan tortib to iqlim o‘zgarishi, tengsizlik va moliyalashtirishdagi defitsitni kamaytirishga qaratilgan barqaror yechimlarni amalga oshirishni faollashtirishga da’vat etadi.

Ma’lumot o‘rnida aytib o‘tish kerakki, 2015 yil 25 sentabr kuni BMTga a’zo davlatlar 2030 yilga qadar barqaror rivojlanish sohasidagi Kun tartibini qabul qildilar.

BMT Bosh Assambleyasining 2015 yilning sentabr oyida BMTning Barqaror rivojlanish sammitida qabul qilingan 70-sonli rezolyutsiyasiga muvofiq, shuningdek, O‘zbekiston Respublikasi Vazirlar Mahkamasi tomonidan 2018 yilning 20 oktabr kuni 2030 yilga qadar BMT Global kun tartibining Barqaror rivojlanish maqsadlarini izchil amalga oshirish maqsadida barqaror rivojlanish sohasidagi 16 ta Milliy maqsadlar va unga bog‘liq 2030 yilgacha bo‘lgan davr uchun 127 ta vazifalar tasdiqlandi.

Nafosat Tojiboyeva