Хитойда Фуцзянь провинциясининг Цюаньчжоу шаҳридаги меҳмонхона қулаб тушиши оқибатида 70дан ортиқ киши харобалар остида қолди. Беш қаватли меҳмонхонадан коронавирусдан зарарланганлар билан алоқада бўлган одамларни карантин ҳолатида сақлаш учун фойдаланилаётганди.

Қутқарувчилар хароба остидан одамларни чиқаришмоқда / AFP/GETTY

Сўнгги маълумотларга кўра, камида 10 киши ҳалок бўлгани тасдиқланган ва яна ўнлаб кишилар бедарак йўқолган. 

Ушбу беш қаватли бинода ҳалокатдан олдин 71 киши бўлган, улардан 58 нафари - вирус юқтиргани гумонланган кишилар бўлган.

Ўнлаб кишилар харобалар остидан олиб чиқилган. Қутқарувчилар айни вақтда яна омон қолганларни қидиришмоқда.

Меҳмонхона 2018 йилда қурилган, унда мижозлар учун 80 хона мавжуд эди. Ҳозирча маҳаллий вақт билан 7 март куни 19:30да (Тошкент вақти билан соат 21:30) рўй берган ҳодиса сабаби маълум эмас.

Синьхуа агентлиги хабарига кўра, январь ойида ушбу бинонинг биринчи қаватида таъмирлаш ишлари олиб борилганди, ҳозирда полиция меҳмонхона раҳбарларини сўроқ қилмоқда.

Beijing News нашри ушбу меҳмонхонада қариндошлари турган аёлнинг сўзларини келтирган: «Мен улар билан боғлана олмадим, улар қўнғироқларга жавоб беришмади. Менинг ўзим ҳам карантиндаман [бошқа меҳмонхона] ва жуда хавотирланяпман. Нима қилишни ҳам билмайман. Улар соғлом эди, ҳар куни ҳароратларини ўлчашаётганди ва тестлар барчаси нормал ҳолатдалигини кўрсатаётганди».

Фуцзянь провинциясида коронавирусдан зарарланган 296 киши аниқланган, 11 мингдан ортиқ киши беморлар билан алоқада бўлгани туфайли тиббий кузатувга олинган. Уҳандан 1000 километр узоқликда жойлашган Цюаньчжоу шаҳрида 47 кишида вирус аниқланган.

• ЖССТнинг сўнгги маълумотларига кўра, бутун дунё бўйлаб коронавирусдан зарарланганлар сони 106 203 нафарга етган, шундан 26 мингга яқин ҳолат Хитойдан ташқарида қайд этилган. Жами 3600 киши вирус қурбони бўлган, шундан 3097 киши - Хитойда. 60 190 киши тузалиб кетган.