14:34 / 10.03.2020
12372
Алишер Шодмонов: «Коронавирус бўйича рақамлар фақат ўсмоқда, аммо даволанишда ютуқларга ҳам эришиляпти» 

2 ой олдин дунё бўйича хотиржамлик эди. Аммо ҳозир ЖССТ томонидан фавқулодда вазият эълон қилинди. Айни вақтда пандемия эълон қилиш керакми, йўқми деган масала кўриляпти

Фото: Соғлиқни сақлаш вазирлиги ахборот хизмати

Соғлиқни сақлаш вазирлиги томонидан Ахборот ва оммавий коммуникациялар агентлигида Ўзбекистонда коронавирус инфекцияси (COVID-19)нинг профилактикаси ва унинг кириб келишининг олдини олиш масалаларига бағишланган матбуот анжумани ташкил этилди. 

Тадбирда Ўзбекистон Республикаси соғлиқни сақлаш вазири Алишер Шодмонов дунёда коронавируснинг эпидемик ҳолати ва COVID-19’нинг мамлакатга кириб келиши ҳамда тарқалишининг олдини олиш бўйича  кўрилаётган чоралар тўғрисида маълумот берди.

– Коронавирус бўйича рақамлар фақат ўсишга қараб кетмоқда. Аммо хурсанд бўладиган жиҳати, касалликни даволанишда ютуқларга ҳам эришиляпти. Хусусан, Уханда кучли тартиб туфайли кескин тарқалиш пасайди, ўлим сони камайди. Жанубий Корея, Италия каби давлатларда тарқалиш кучли бўляпти. Италия ўлим кўрсаткичи бўйича биринчи ўринга чиқди. Жанубий Кореяда аҳвол барқарорлашмоқда. Эронда минг афсуски ўсиш кўрсаткичлари кун сайин ўсиб бормоқда. Бир қатор Европа давлатларида ҳам бу касаллик тарқалиб боряпти. Японияда барқарорликка эришиш бошланди.

2 ой олдин дунё бўйича хотиржамлик эди. Аммо ҳозир ЖССТ томонидан фавқулодда вазият эълон қилинди. Ҳозир пандемия эълон қилиш керакми, йўқми деган масала кўриляпти. Бошқа касалликлар билан ўлим кўрсаткичлари солиштирганда коронавирусда баланд эмаслиги кўринади.

Биринчи навбатда, вирус геноми эълон қилинди, вакцина бўйича иш бошланди. Диагностика тизими ишлаб чиқилди. Вируснинг L ва S турлари, яъни оғир ва енгил шакллари аниқланди. Касаллик асосан кексаларда аниқланмоқда, Японияда ҳатто ўртача ёши 81 ёш экани ҳисоблаб чиқилган. Ўрта Осиё ва Қозоғистон бу касаллик қайд этилмаган ҳудуд бўлиб турибди. 

Қайд этилганидек, коронавирус инфекцияси бўйича юзага келган нохуш вазият мазкур касалликнинг юртимизга четдан кириб келиш хавфини оширмоқда. 

Ўз навбатида, профилактика ва назорат чораларини кучайтириш мақсадида мактабгача таълим, халқ таълими, олий ва ўрта-махсус таълими каби каби қатор  вазирлик ва идоралари билан қўшма қарорлар қабул қилинди.

Айни пайтда мамлакатга юқумли касалликлар, жумладан, COVID-19 инфекцияси кириб келишининг олдини олиш мақсадида давлат чегараларида 53 та санитария-карантин пунктлари халқаро талаб ва мезонлар асосида фаолият кўрсатмоқда. Бугунги кунда ушбу пунктларда бошқа тармоқ ходимлари қаторида 250 нафардан зиёд юқори малакали санитария-эпидемиология хизмати масъуллари белгиланган стандартлар бўйича иш олиб бормоқда. 

Коронавирусни аниқлаш бўйича замонавий тест-системалари, шунингдек, тиббиёт ходимлари учун шахсий ҳимоя воситалари, тиббий техника ва тиббий буюмлар захираси яратилмоқда. Соғлиқни сақлаш вазирлиги ва Санитария-эпидемиологик осойишталиги агентлиги ҳузурида узлуксиз 24 соат давомида фаолият кўрсатувчи штаб ташкил қилинган.

Мавзу
Коронавирус
2019 йилнинг декабрь ойи охирида Хитойнинг Ухань шаҳрида номаълум вирус тарқала бошлади. Бу вирус ҳаво орқали одамдан одамга юқади ва ўлимга олиб келади.
Барчаси
Top