16:54 / 16.03.2020
11418
Ўзбекистонда барча оммавий ибодатлар вақтинчалик тўхтатилди - Дин ишлари бўйича қўмита 

Карантин даврида барча диний ташкилотларда, жумладан масжидларда, черков ва ибодатхоналар, диний таълим муассасалари, мадрасалар, семинария ва монастирларда тўлиқ дезинфекция ишлари амалга оширилади.

16 март кунидан Ўзбекистондаги барча диний конфессияларда ҳам ўрнатилган тартибда оммавий ибодатлар, маросимлар вақтинчалик тўхтатилди. Шунингдек, уларга қарашли диний таълим муассасаларининг талаба-ўқувчилари ҳам таътилга чиқарилган.

«16 март кунидан эътиборан республикамизда коронавирус тарқалишининг олдини олиш бўйича карантин эълон қилинди. Бош вазир Абдулла Арипов бошчилигида ўтказилган йиғилишда барча диний ташкилотларда диний маросимларни вақтинча ўтказмаслик бўйича илтимос билан мурожаат этилганди.

Ана шу кўрсатмага биноан, шунингдек, Дин ишлари бўйича қўмита томонидан мамлакатимизда фаолият олиб бораётган Ўзбекистон Мусулмонлари идораси ва бошқа 15та диний конфессияларга кенг аҳоли қатламларининг жамоат жойларида йиғилишининг олдини олиш мақсадида оммавий диний тадбирлар ва бошқа маросимлар ўтказилишини вақтинча тўхтатиш бўйича тавсия хати юборилди.

Зудлик билан диний идорада Уламолар кенгаши йиғилиши чақирилди. Ушбу масала Уламолар кенгаши аъзолари томонидан ўрганилди ва Мусулмонлар идорасининг махсус фатвоси ишлаб чиқилди.

Интернетда эълон қилинган мазкур фатвога кўра 16 мартдан санитар-эпидемиологик осойишталикни таъминлаш мақсадида жорий этилган карантин жараёнида Ўзбекистон Мусулмонлар идораси тизимидаги диний ташкилотлар, таълим муассасалари ва зиёратгоҳлар объектларида оммавий тарзда ўтказиладиган маросимлар, ибодатлар ва шу каби тадбирлар вақтинчалик чекланди. Жумладан, масжидларда кунлик жамоат намозлари, жума намозлари ҳамда жаноза намозини адо этиш вақтинчалик тўхтатилди.

Юртдошларимизга барча диний ибодатларни ўз уйларида амалга ошириши тавсия этилди. Шунингдек, диний таълим муассасаларида талабалар, ўқувчилар ва тингловчиларга ҳам таътил эълон қилинди.

Ўз навбатида, бошқа диний конфессияларда ҳам ўрнатилган тартибда оммавий ибодатлар ва маросимлар вақтинча тўхтатилди. Шунингдек, уларга қарашли диний таълим муассасаларининг семинария ва монастир талаба-ўқувчилари ҳам таътилга чиқади.

Карантин даврида барча диний ташкилотларда, жумладан, масжидларда, черков ва ибодатхоналар, диний таълим муассасалари, мадрасалар, семинарий ва монастирларда тўлиқ дезинфекция ишлари амалга оширилади», деган Дин ишлари бўйича қўмита вакили.

  • 15 март куни Ўзбекистонда коронавирусга чалинишнинг илк ҳолати қайд этилди. Айни вақтда вирус юқтирган ўзбекистонликлар сони 6 нафарни ташкил қилмоқда.
  • 15 март куни бош вазир Абдулла Арипов иштирокида ўтказилган матбуот анжуманида ҳукумат мамлакатдаги барча диний идораларга диний маросимларни ўтказишни вақтинча чеклаш бўйича мурожаат билан чиққани хабар қилинганди.
Мавзу
Коронавирус Ўзбекистонда
15 март куни Ўзбекистонда коронавирусга чалинган илк бемор аниқланди.
Барчаси
Top