13:26 / 16.03.2020
19884
Хорижда қолиб кетган ўзбекистонликлар чартер авиарейслар билан ватанга қайтарилиши кутиляпти

Ташқи ишлар вазирлиги хориждаги Ўзбекистон фуқароларига махсус мурожаат билан чиқди.

Фото: Соғлиқни сақлаш вазирлиги ахборот хизмати

Республика махсус комиссиясининг 2020 йил 16 мартдан бошлаб Ўзбекистоннинг хорижий давлатлар билан барча халқаро авиа, авто ва темир йўл қатновларини вақтинча бекор қилиш тўғрисидаги қарори ва бунинг натижасида юзага келувчи муаммолар муносабати билан Ўзбекистон Ташқи ишлар вазирлиги, элчихоналар ва консуллик муассасаларида Ўзбекистоннинг хориждаги фуқаролари мурожаатларига тезкорлик билан жавоб бериш учун Оператив штаблар тузилганлиги маълум қилинди.

Ўзбекистоннинг дипломатик ваколатхоналари хорижда қолиб кетган ватандошларга чартер авиарейслар билан ватанга қайтишларида кўмаклашади. Фуқаролар ватанга қайтишлари билан 14 кун давомида карантинда бўлишлари шарт.

2020 йил 16 мартдан Ўзбекистонга чет эл фуқароларининг киритмаслик тўғрисидаги қарорнинг кучга кирганлиги муносабати билан электрон кўринишдаги визаларни расмийлаштириш ва бериш тизими фаолияти, уларни хориждаги дипломатик ваколатхоналарда берилиши тўхтатилди.

Дипломатик ваколатхоналарга хорижлик шерикларга ўз фуқароларини Ўзбекистондан ватанларига олиб чиқиб кетишга кўмаклашиш учун ҳукумат томонидан барча чоралар кўрилишини етказиш тўғрисида топшириқ берилди.

Шу билан бирга, республика дипломатик ваколатхоналаридаги барча байрам ва бошқа оммавий тадбирлар бекор қилинди, барча ходимларнинг хорижда уюштириладиган шу каби тадбирларда иштироки чекланди.

Шунингдек, Ўзбекистон Ташқи ишлар вазирлиги эслатиб ўтади:

Хориждаги Ўзбекистон фуқароларига ватанга қайтиш учун давлат чегарасидан ўтиш тақиқланмайди. Ўзбекистон ҳудудига кириш борасида 2020 йил 16 мартдан жорий қилинган чекловлар, авваламбор, бошқа давлатларнинг фуқароларига тегишли.

Шу билан бирга, давлатдан ташқарига чиқиш бўйича вақтинча тақиқ Ўзбекистон фуқароларига тегишли бўлиб, ҳозирда мамлакатда бўлиб турган хорижий фуқароларга нисбатан қўлланилмайди.

Ўзбекистон Республикаси Ташқи ишлар вазирлиги Оператив штаби
Оператив штаб телефонлари: +998 71 233 28 28, +998 97 136 51 51 (мобил)
Call center – 1164
Telegram: +99897 136 51 51
ТИВ электрон почтаси: info@mfa.uz.

Мавзу
Коронавирус Ўзбекистонда
15 март куни Ўзбекистонда коронавирусга чалинган илк бемор аниқланди.
Барчаси
Top