Boris Jonsonning ahvoli og‘irlashdi. U intensiv terapiya bo‘limiga o‘tkazilgan

Jonsonda 26 mart kuni virus aniqlangan, 5 aprel kuni Londondagi Sent Tomas kasalxonasiga yotqizilgan edi.

Bosh vazir ofisidan ma'lum qilishlaricha, 6 aprel kuni tushdan keyin uning holati yomonlashgan va intensiv terapiya bo‘limiga o‘tkazilgan.

«Bosh vazir mamlakatning birinchi vaziri – Tashqi ishlar vaziri Dominik Raabdan zarur hollarda uning o‘rnini egallashni so‘radi», – deyiladi rasmiy xabarda.

The Guardian`ning qayd etishicha, 55 yoshli Boris Jonson hushyor holatda, shifokorlarning qarori unga tezkor sun'iy nafas oldirish zarurati tug‘ilishi ehtimoli bilan bog‘liq.

Reuters`ning qo‘shimcha qilishicha, bundan avvalroq, bosh vazirda pnevmoniya kuzatilmayaptimi, degan savolga uning matbuot kotibi aniq javob bermagan.

Eslatib o‘tamiz, Buyuk Britaniya hukumati rahbarining kasalxonaga yotqizilishi unda koronavirus aniqlanganidan keyin 10 kun o‘tgan bo‘lsa ham, kasallik alomatlari yo‘qolmagani bilan izohlangan edi.

Dushanba kuni Birlashgan Qirollikda koronavirus yuqtirib olganlar soni 50 mingdan oshdi. Bor-yo‘g‘i 135 kishi sog‘aygan, qurbonlar esa 5300dan ortiq.