18:40 / 17.04.2020
8580
Ўзбекистонда коронавирусга чалинганларни аниқлаш бўйича кунига ўртача 10 мингга яқин таҳлиллар текширилмоқда – Баҳром Алматов

Ўзбекистонда коронавирус билан касалланган фуқаролар билан мулоқотда бўлганларни аниқлаш, касалликни юқтирганларга ташхис қўйиш учун узлуксиз ишлаётган вирусологик лабораторияларда бир кунда ўртача 10 мингга яқин таҳлиллар текширилмоқда.

Фото: Reuters

Бу ҳақда Республика давлат санитария-эпидемиология осойишталик агентлиги директори Баҳром Алматов 17 апрель куни АОКАда бўлиб ўтган брифингда маълум қилди.

“Ўзбекистонда коронавирус билан касалланган фуқаролар билан мулоқотда бўлганлар бўйича эпидемиологик суриштирув ишлари давом эттирилмоқда. Бу жараёнга барча мутасадди идораларнинг ходимлари жалб этилган.

Вирусологик лабораторияларда тест тизимларини текшириш ишлари давом этмоқда. Бу лабораторияларда узлуксиз иш жараёнида бир кунда ўртача 10 мингга яқин таҳлиллар текширилмоқда. Ҳозирги кунгача жами 136 мингта текшириш ишлари амалга оширилган.

Коронавирус инфекциясини юқтирганлик ташхиси лаборатория таҳлиллари натижаси бўйича қўйилади. Бунинг учун иккита босқичда тест олинади. Биринчи навбатда скрининг тестлари олинса, касаллик гумон қилинган ҳолатларда тасдиқловчи тест тизимларидан фойдаланиб келмоқдамиз. Бу ишлар Жаҳон соғлиқни сақлаш ташкилотининг берган тавсиялари ва халқаро тажрибалар асосида амалга оширилмоқда”, дея Баҳром Алматовнинг сўзларини келтирмоқда Kun.uz мухбири.

Унинг таъкидлашича, бугунги кунда Ўзбекистонда жами 274 та карантин муассасаси белгиланган бўлиб, шундан 214 тасида 22 минг киши 14 кунлик карантинда сақланмоқда. Бундан ташқари, 70 мингдан ортиқ фуқаро уй шароитида тиббий назоратга олинган.

Аввалроқ Ўзбекистонда вирус аниқланмаган ҳудуд қолмаганлиги, Тошкент шаҳри, Бухоро ва Хоразм вилоятларида касалланиш юқори эканлиги маълум қилинганди.

Соғлиқни сақлаш вазирлигининг билдиришича, беморларнинг аксар қисми карантинда сақланган фуқаролар орасидан аниқланган бўлиб, уларнинг касаллиги тасдиқлангач ҳудуддаги юқумли касалликларга ихтисослашган тиббиёт муассасаларга даволаш учун жойлаштирилган.Шу вақтгача тузалган беморлар сони 140 нафарга етган, 4 киши вафот этган.

Мавзу
Коронавирус Ўзбекистонда
15 март куни Ўзбекистонда коронавирусга чалинган илк бемор аниқланди.
Барчаси
Top