«Davlat o‘z vazifasini tadbirkorning yelkasiga ilmoqchi emas» - Jamshid Qo‘chqorov «Saxovat va ko‘mak» umumxalq harakati haqida

Xalqaro press-klubning navbatdagi sessiyasida so‘z olgan O‘zbekiston Bosh vaziri o‘rinbosari – Iqtisodiy taraqqiyot va kambag‘allikni qisqartirish vaziri Jamshid Qo‘chqorov prezident ilgari surgan «Saxovat va ko‘mak» umumxalq harakati haqida to‘xtalib o‘tdi.

«Muhtaram prezidentimizning g‘oyalari – tadbirkorlarni yordamchi qilib olish. Ularning pulini olib, ishlatish emas. Davlat o‘zining yelkasidagi vazifani tadbirkorning yelkasiga ilmoqchi emas. Bir so‘m bo‘lsa, bir so‘m, bir milliard bo‘lsa, bir milliard so‘m pulini unga qoplab berish haqida aniq topshirig‘imiz bor. Mana, Moliya vaziri ham buni kerak bo‘lsa, tasdiqlab beradi.

Bu qanday bo‘ladi degan savolga, shu summaga foydaga tortish soliq bazasi kamaytiriladi yoki uni mahalliy soliqlardan bo‘lgan to‘lovlari – kelgusi to‘lovlarimi, misol bu yer-mulk va hokazo soliqlar... Mahalliy kengashda huquq bor, shuni 6 oyga cho‘zib berishlari mumkin. Yoki bankka murojaat qiladigan bo‘lsa, bankda kreditlarini uzaytirish mumkin. Yoki kerak bo‘lsa, shu tashkilot 3-smenada ishlayapmiz, kechasiga elektrni arzonlashtirib bering desa, elektr energiyasini 50 foizgacha arzonlashtirib beramiz.

Ya'ni tadbirkor birinchi navbatda mablag‘i bilan emas, harakati bilan davlat bilan yonma-yonma yon turibdi. Shuning uchun uning har bir so‘mi qoplab beriladi. Bu haqida umuman shubha bo‘lishi mumkin emas», – dedi Jamshid Qo‘chqorov.

Eslatib o‘tamiz, prezident Shavkat Mirziyoyev 20 aprel kungi videoselektorda «Saxovat va ko‘mak» umumxalq harakatini yo‘lga qo‘yish tashabbusini ilgari surdi. Unga asosan, tadbirkorlar aholining ehtiyojmand qatlamini qo‘llab-quvvatlashga hissa qo‘shib, bu hissa miqdoriga qarab davlatdan turli imtiyozlar oladi.