Prezident Olot tumanida aholi bilan muloqot chog‘ida dastlab koronavirusga qarshi olib borilayotgan ishlar haqida gapirdi.
«Bu yo‘nalishda Buxoroda ham katta ishlar qilinyapti. Har bir fuqaroning hayotini saqlab, birorta ham o‘lim bo‘lmasligi uchun 24 soat harakat qilyapmiz. Albatta, bu boshimizga tushgan katta sinov. Men birinchi kundanoq aytdimki, bu sinovdan qudratli bo‘lib chiqamiz, bir-birimizga mehrimiz, muhabbatimiz, albatta, oshadi.
Bugun ham Xudo taoloning katta sinovi bo‘ldi. Ikki tuman - Olot va Qorako‘lda bo‘lgan voqea — buyam bir sinov», dedi prezident.
Prezident hodisa haqida, yetkazilgan zararning ko‘lami to‘g‘risida to‘la xabardorligini aytib o‘tdi.
«Eng muhimi sizlarning kayfiyatlaring buzilmasligi uchun o‘zim yetib keldim. Qo‘limda hamma ma'lumot bor. Qaysi maktab, qaysi xonadon, qaysi bog‘cha, qaysi shifoxonaga qancha mablag‘ kerak bo‘lsa, shuncha mablag‘ beramiz.
Birorta xonadon, birorta korxona, birorta fermerga zarar yetkazmaymiz. G‘alla buzilgan joyda paxta ekamiz. Mehnat qilamiz, jipslashamiz. Ertaga daromadimiz bundan ham ko‘p bo‘ladi.
Men hamma qarorlarni qabul qildim, hech qanday zarar bo‘lmaydi. Eng asosiysi, vahimaga tushmasdan, saranjom bo‘lib, odamlarimizni saqlashimiz kerak. Shuning uchun hammamiz ehtiyot bo‘lib, ogoh bo‘lib o‘z ishimizni davom ettirishimiz kerak.
Xudoga ming qatla shukr, bu ish kunduzi bo‘lmadi. Aks holda ko‘p odam yo‘qotib qo‘yardik, odamlar sarosimaga tushib qolardi. Kechasi odamlar ichkarida bo‘lgani uchun odam yo‘qotmadik, qarindoshimizni, farzandimizni, nevaramizni, qo‘shnimizni yo‘qotmadik. Faqat bir Ashurov... joyi jannatdan bo‘lsin. Farzandi tirik. Oilasiga yordam beriladi. Hamma chora-tadbirlarni ko‘ramiz.
Ikki tuman uchun kerakli kuch va vositalarni, mablag‘larni beramiz. Qorako‘l va Olotni yangilaymiz. Mahalla raislaridan iltimos, har bir xonadonga kirib, karantin normalarini saqlab, odamlarga rahmatimni va iltimosimni yetkazinglar, ogohlikka da'vat qilib, sarosimaga tushmaslikni iltimos qilaman.
Hammaga qozonini qaynatishgayam sharoit yaratib beramiz. Ikki-uch marta aylanib hamma joyni ko‘rdim. Menda kelishimdan oldin ma'lumotlar bor edi, lekin o‘zim kelib ko‘rishim, ko‘zlaringga qarab gapirishim boshqa edi. Toshkentdan turib gapirish ham mumkin, lekin kelib ko‘rish — mutlaqo boshqa narsa...
