Farmklaster barpo etish uchun 50 mln dollargacha yo‘naltiriladi

Tashkent Pharma Park – o‘z ichiga Farmatsevtika texnik universiteti va sanoat zonasini olgan innovatsion ilmiy-ishlab chiqarish farmatsevtika klasteri. Klasterni Toshkent viloyati Qibray tumanida joylashtirish rejalashtirilmoqda. 
 
Norma’ning yozishicha, Tiklanish va taraqqiyot jamg‘armasi farmklasterni tashkil etish loyihasini moliyalashtirish uchun 50 mln dollargacha ajratadi. Qarzdor - Farmatsevtika tarmog‘ini rivojlantirish agentligi. Qarzni so‘ndirish va unga xizmat ko‘rsatish bilan bog‘liq xarajatlar klaster hududidagi obektlarni sotish va binolarni ijaraga berishdan tushgan tushumlar, Farmatsevtika tarmog‘ini qo‘llab-quvvatlash va rivojlantirish jamg‘armasi hamda qarzdorning boshqa tushumlari hisobidan amalga oshiriladi.
 
Birinchi navbatdagi obektlar qurilishini mamlakatimiz Bosh vaziri rahbarligidagi maxsus ishchi guruh tashkillashtiradi. Ishchi guruh loyihaviy takliflarni ko‘rib chiqadi, bosh pudratchilarni tanlaydi, qurilishning borishi va mablag‘lardan samarali foydalanilishi ustidan nazorat qiladi. Tashkent Pharma Park direksiyasi (loyihaning ijro etuvchi organi) qurilayotgan obektlar bo‘yicha asbob-uskunalar, tovarlar, ishlar va xizmatlarni qabul qilib olish uchun mas'ul hisoblanadi.
 
Moliyalashtirish ishchi guruhning qaroriga binoan parallel ravishda quyidagilarni ekspertizadan o‘tkazgan holda amalga oshiriladi:

loyihani - Farmatsevtika tarmog‘ini rivojlantirish agentligining tarmoq Ilmiy-texnik kengashida;

loyiha-smeta hujjatlarini - Qurilish vazirligida;

zamonaviy import asbob-uskunalar va texnologiyalar, qurilish materiallari, butlovchi buyumlarni xarid qilish bo‘yicha import kontraktlarini - Loyihalar va import kontraktlarini kompleks ekspertiza qilish markazida.
 
Hujjat 29.04.2020 yildan kuchga kirdi.