16:56 / 12.05.2020
9055
Мисрлик миллиардер бир баррель нефть нархи 100 долларгача кўтарилишини айтди

Унинг сўзларига кўра, Саудия Арабистони ва Россия АҚШнинг сланецли нефтини йўқ қилиш учун нарх урушини бошлаган.

Фото: Global Look Press

Бир баррель нефть нархи бир ярим йил ичида 100 долларгача кўтарилади. Мисрлик миллиардер, Orascom Telecom Media and Technology холдинги эгаси Нажиб Савирис CNBC телеканалига берган интервьюсида ана шундай фикрни айтди.

Унинг сўзларига кўра, Саудия Арабистони ва Россия АҚШнинг сланецли нефтини йўқ қилиш учун нарх урушини бошлаган.

«Бу ҳисоб-китоб қилинган деб ўйлайман», — деди Савирис. 

Унинг таъкидлашича, Саудия Арабистони ва Россия коронавирус пандемияси сабабли нефть нархи кескин тушиб кетишини билган, аммо «рақобатчини ўлдириш» ва нархни 50 доллардан 60 долларгача етказиш учун вазиятни янада кескинлаштирган.

«18 ойдан кейин бир баррель нефть нархи 100 долларга етишига ростдан ҳам ишонаман», — деди бизнесмен.

Март бошларида коронавирус пандемияси ва ОПЕК+ шартномасининг бекор бўлиши ортидан нефть нархи кескин тушиб кетди.

12 апрелдаги тезкор видеоанжуманда ОПЕК+ давлатлари нефть қазиб олиш ҳажмини қисқартириш бўйича келишувга эришди. Бу келишув май-июнда нефть қазиб олиш ҳажмини кунига 9,7 млн, июль-декабрда 7,7 млн, 2021 йил январь-2022 йил апрелда 8,8 млн баррелга қисқартиришни кўзда тутади.

Келишувга кўра, нефть бозоридаги энг йирик иштирокчилар - Саудия Арабистони ва Россия нефть қазиб олиш ҳажмини 2,5 млн баррелдан, бошқа иштирокчилар эса 2018 йил октябрдаги даражада қисқартиради.

12 май куни Саудия Арабистони, Қувайт ва БАА нефть қазиб олишни янада камайтиришини маълум қилди.

Forbes маълумотига кўра, 66 ёшли Нажиб Савирис дунёнинг энг бой кишилари рўйхатида 769-ўринда туради. Унинг бойлиги 3 млрд доллар деб баҳоланади.

Top