Kun.uz muxbiri xabar berishicha, prezident Turizmni rivojlantirish bo‘yicha davlat qo‘mitasi raisi Aziz Abduhakimovga viloyatda ikki oy muddat ichida ichki turizm dasturini ishlab chiqib, dastur doirasida boshqa hududlardan viloyatga ichki sayohatlarni tashkil qilish jadvalini tasdiqlatishini aytdi.
Prezident Xonobod shahrini Farg‘ona vodiysining «Turizm markazi»ga aylantirilishi taklifini bildirgan. Turizmni rivojlantirish bo‘yicha davlat qo‘mitasi va boshqa mas'ullarga Xonobod shahrini turizm markaziga aylantirish konsepsiyasi va uni rivojlantirishning bosh rejasini ishlab chiqish topshirig‘i berilgan.
Bundan tashqari, yer osti ma'danli suv buloqlari mavjudligini hisobga olib, Xonoboddan 10 gektar yer ajratilgan holda «ma'danli suv» brendi yaratilishi aytildi. Shaharda yana bir sog‘lomlashtirish sanatoriysi tashkil etiladi.
Shuningdek, Madaniyat vaziri Ozodbek Nazarbekovga 2020-2021 yillarda Xonobodda turli festival va tadbirlar o‘tkazish ro‘yxatini shakllantirish topshirig‘i berilgan.
