Boshqirdistonda 50dan ortiq o‘zbekistonlik ishchi virusga chalindi

«Kommersant'» nashri xabar berishicha, so‘nggi haftada bu yerda 53ta yangi zararlanish holati qayd etilgan, ularning barchasi O‘zbekistondan kelgan mehnat muhojirlaridir. Ma'lum bo‘lishicha, «Skazka» mehmonxonasiga joylashgan o‘zbekistonlik 68 nafar ishchi Chelyabinsk oblasti bilan chegara hududida joylashgan «Gorniy» issiqxona kompleksida ishlash uchun kelishgan.

Boshqirdiston Sog‘liqni saqlash vazirligi ma'lumotiga ko‘ra, virusdan zararlanganlarning aksari kasallikni yengil formada o‘tkazishmoqda, faqat sakkiz kishi shifoxonaga joylashtirilgan. Rospotrebnadzorning Boshqirdistondagi boshqarmasi epidemiologik tekshiruv boshlagan. Taxmin qilinishicha, ishchilar mahalliy sotuvchidan virus yuqtirgan bo‘lishi mumkin.

«Gorniy» issiqxonasi – Chelyabinskdagi «Churilovo» agroxoldingi tarkibiga kiruvchi Uraldagi eng yirik issiqxona kompleksi hisoblanadi. O‘zbekistonlik migrantlar bu yerga fevralda kelishgan. Ular Moskvadagi «Standart plyus» kompaniyasi tomonidan «Skazka» mehmonxonasiga joylashtirgan. Mehmonxona ham Chelyabinsk oblasti chegarasi yaqinida joylashgan.

Virusdan zararlanganlarning besh nafari Mesyagutovoda, uch nafari esa Kiginskda shifoxonaga yotqizilgan. Qolgan bemorlarda kasallik yengil o‘tmoqda va ular mehmonxonada qolgan. Mehmonxona o‘zi karantinga olingan.

Mehnat muhojirlarida kasallik belgilari 10 may kuni paydo bo‘la boshlagan. 11 may kuni Rospotrebnadzor barcha ishchilarni tekshirishga ko‘rsatma bergan. 12 may kuni issiqxona xodimlari izolyatsiyaga yuborilgan: shu kunning o‘zida ikki kishida virus aniqlangan. Mehmonxona karantinga olinib, politsiya posti o‘rnatilgan. 15 may kuni Chelyabinsk oblastiga poyezdda borib qaytgan yana ikki ishchida koronavirus aniqlangan.

Ayni vaqtda mehmonxonada 60 kishi izolyatsiyaga olingan. Kasallar bilan aloqada bo‘lgan 28 nafar boshqirdistonlik o‘z o‘zini ihotalashga yuborilgan. Ular orasida mehmonxona yaqinida joylashgan do‘konning 6 nafar xodimi ham bor. Hozirda bemorlar bilan aloqada bo‘lgan uch kishida koronavirus tasdiqlangan, jumladan, do‘kon sotuvchisida ham.

Shu vaqtgacha Boshqirdistonda virusning asosiy o‘chog‘i shifoxonalar edi.

Rospotrebnadzorning hududiy boshqarmasi Maloyazdagi holatlar bo‘yicha epidemiologik surishtiruv olib bormoqda. Versiyalardan biriga ko‘ra, migrantlar mehmonxona ro‘parasidagi do‘kon sotuvchisidan virus yuqtirgan bo‘lishi mumkin.

«Unda kasallik simptomlarsiz rivojlangan. Ikkinchi versiyaga ko‘ra, ishchilar mehnat patenti olish uchun tekshiruvdan o‘tish uchun Chelyabinsk oblasti migratsiya xizmatiga borganida virus yuqtirgan bo‘lishi mumkin», deyiladi xabarda.

«Gorniy» issiqxona kompleksida 550 kishi ishlaydi. «Agropark Ural» kompaniyasi rahbari Yevgeniy Baturinning so‘zlariga ko‘ra, kompaniya o‘zbekistonlik muhojirlar bilan 2020 yil oxiriga qadar shartnoma imzolagan. U faqat qilingan ish uchun to‘lov qilish variantini ko‘rib chiqmoqda.