Taqiqqa qaramay, ko‘plab tashkilot va hokimliklarda yig‘ilishlar davom etmoqda - Shohrux G‘iyosov

Maxsus komissiya qarori bilan, davlat organlari va tashkilotlarida majlislar o‘tkazilishi yana bir marta taqiqlandi. Alohida zarur hollarda yig‘ilishlarni videokonferens aloqa rejimida o‘tkazish talab etilmoqda.

Ichki ishlar vazirligi matbuot kotibi Shohrux G‘iyosov yig‘ilishlar o‘tkazish bundan avval ham taqiqlanganini ta'kidlab, shunga qaramay ko‘plab korxona va tashkilotlarda majlislar davom etayotganini qayd etdi.

«Bu ham zaruriy chora. Chunki yig‘ilish o‘tkazish taqiqlanganiga qaramay, juda ko‘p korxonalar, tashkilotlar, hokimiyatlarda yig‘ilishlar o‘tkazish davom etmoqda va bu umumiy vaziyatga jiddiy ta'sir qilmoqda», – deya G‘iyosovning AOKAda o‘tgan matbuot anjumanidagi so‘zlarini keltirmoqda Kun.uz muxbiri.

Eslatib o‘tamiz, ayni paytda jamoat joylarida 3 kishidan ortiq to‘planish taqiqlangan.