Belgiyadagi shaharda favvora ostidan birinchi merning yuragi solingan quti topildi

Belgiyaning Verve shahri markazidagi favvora ta'mirlanishi vaqtida uning ostida shaharning birinchi meri yuragi solingan quti topildi. Bu haqda Daily Mail  nashri xabar berdi.

Yurak shaharning birinchi meri Per Davidga tegishli bo‘lgan. U Belgiya mustaqillikka erishgandan keyin Vervega rahbarlik qilgan.

Shu tariqa “shahar yuragida haqiqiy inson yuragi yotishi” haqidagi qadimiy afsona tasdiqlangan. Yurak alkogol solingan idishda saqlangan. Idish esa o‘z navbatida rux metallidan ishlangan qutiga joylashtirilgan.

Per David Vervega 1798 yildan o‘z o‘limigacha qadar – 1839 yilgacha rahbarlik qilgan. U shaharga turli tuzumlar vaqtida merlik qilgan, 1830 yildagi inqilobdan keyin esa shaharda osuda hayot kechishi uchun barcha imkoni bor ishni amalga oshirgan. Jumladan, u shaharni o‘t o‘chirish jamoasi va maktab bilan ta'minlagan.

Per David 58 yoshida to‘satdan vafot etgan va mish-mishlarga qaraganda, mahalliy hokimiyat uning yuragini saqlab qolishga qaror qilgan. Tarixiy manbalarda ta'kidlanishicha, merning yuragi 44 yil davomida mahalliy hokimiyat binosida saqlangan. 1883 yilda esa uni shahar markazidagi favvora ostiga ko‘mishga qaror qilingan. O‘sha yildan favvora uning nomi bilan atala boshlangan.