Pillachilik va qorako‘lchilikni rivojlantirish qo‘mitasining asosiy vazifalari belgilanadi

Qo‘mita pillachilik va qorako‘lchilik sohasida yagona davlat siyosatini olib boruvchi, shuningdek, ushbu tarmoqlarni yagona ilmiy-texnikaviy siyosatni yuritgan holda, muvofiqlashtirilgan tarzda rivojlantirishni ta'minlovchi davlat boshqaruvi organi hisoblanadi.

Vazirlar Mahkamasining “O‘zbekiston Respublikasi Pillachilik va qorako‘lchilikni rivojlantirish qo‘mitasi faoliyatini tashkil etish chora-tadbirlari to‘g‘risida”gi qarori loyihasi e'lon qilindi. 
Quyidagilar:

O‘zbekiston Respublikasi Pillachilik va qorako‘lchilikni rivojlantirish qo‘mitasi to‘g‘risida nizom;

“O‘zbekipaksanoat” uyushmasi qoshidagi Pillachilikni rivojlantirish jamg‘armasi mablag‘larini shakllantirish va undan foydalanish tartibi to‘g‘risida nizom;

O‘zbekiston Respublikasi bojxona chegarasi orqali ipak chiqindilari (shu jumladan ipak momig‘i) va xom ipakni olib chiqish ustidan monitoring qilish tartibi to‘g‘risida nizom tasdiqlanadi.

Qo‘mita o‘z vakolatlarini barcha davlat organlari va tashkilotlari, ularning mansabdor shaxslaridan mustaqil ravishda amalga oshiradi va o‘z faoliyatida O‘zbekiston Respublikasining Bosh vaziriga hamda O‘zbekiston Respublikasi Bosh vazirining agrar va oziq-ovqat sohalarini rivojlantirish masalalari bo‘yicha o‘rinbosariga bo‘ysunadi va hisobot beradi.

Qo‘mita tizimiga:

Qo‘mitaning markaziy apparati;

Qo‘mitaning Qoraqalpog‘iston Respublikasi, viloyatlar va Toshkent shahridagi hududiy boshqarmalari;

Ipakchilik ilmiy-tadqiqot instituti;

Qorako‘lchilik va cho‘l ekologiyasi ilmiy-tadqiqot instituti;

Buxoro cho‘l yaylov ozuqabop o‘simliklar urug‘chiligi ilmiy-ishlab chiqarish markazi kiradi.
 
Quyidagilar Qo‘mitaning asosiy vazifalari hisoblanadi:

pillachilik va qorako‘lchilik sohasida yagona davlat siyosatini olib borish, shuningdek, ushbu tarmoqlarni yagona ilmiy-texnikaviy siyosatni yuritgan holda, muvofiqlashtirilgan tarzda rivojlantirishni ta'minlash;

tut plantatsiyalari va yaylovlarning qat'iy hisobini yuritish va fondini o‘rganish, shuningdek, pillachilik va qorako‘lchilikni rivojlantirish uchun ozuqa bazasini yaxshilash;

ipak qurti va qorako‘l zotli qo‘ylarning yuqori darajada mahsuldor nasllarini joriy qilish;

pilla va qorako‘l terisidan tayyor mahsulot ishlab chiqarish maqsadida xomashyo tayyorlash va uni qayta ishlash uchun qulay sharoitlar yaratish;

marketing tadqiqotlarini o‘tkazish hamda ipak va qorako‘ldan tayyorlangan mahsulotlarni eng avvalo tashqi bozorlarda sotishga ko‘maklashish;

pillachilik va qorako‘lchilik bilan shug‘ullanuvchi tadbirkorlik sub'yektlariga o‘z faoliyatini kengaytirish, klasterlar tashkil etish va mahsulotni eksport qilishda har tomonlama yordam berish.

Qo‘mita har yili O‘zbekiston Respublikasi Prezidentiga va O‘zbekiston Respublikasining Bosh vaziriga Qo‘mitaning faoliyati natijalari to‘g‘risida hisobot beradi.

O‘zbekiston Respublikasi Prezidenti Administratsiyasining tegishli tarkibiy bo‘linmalari rahbarlari va O‘zbekiston Respublikasining Bosh vaziri Qo‘mita rahbarlarining ularga yuklangan vazifalarni samarali bajarishi bo‘yicha faoliyatining doimiy monitoringini olib boradi, Qo‘mita faoliyati samaradorligiga xolisona baho beradi.

Monitoring va baholash yakunlari bo‘yicha Qo‘mitaning alohida o‘rnak ko‘rsatgan rahbarlari, mansabdor shaxslari va xodimlari rag‘batlantiriladi yoxud yo‘l qo‘yilgan jiddiy kamchiliklar uchun egallab turgan lavozimidan ozod qilishgacha javobgarlikka tortiladi.