Rossiya orqali Abxaziyaga ishlashga borgan, pandemiya tufayli ushbu hududda qolib ketgan vatandoshlar Tashqi ishlar vazirligining bayonotiga ishonib 15 oktyabrdan boshlab Abxaziya–Rossiya chegarasida to‘plana boshlagan, ularning yuzga yaqini ortga qaytishni istamay chegara-nazorat punkti atrofida tunayotgan edi.
Tashqi ishlar vazirligining 30 sentabr kungi bayonotida 400ga yaqin vatandoshlarning birinchi guruhi oktabr boshida O‘zbekistonga qaytarilishi aytilgandi. O‘zbekistonning Rostov-Dondagi bosh konsulligi bosh konsuli Rustam Kurganbayev ushbu jarayonning cho‘zilib ketganini charter reyslar bilan olib kelinadiganlar ro‘yxatini tuzishga ko‘p vaqt ketib qolgani, qolaversa, Rossiya Federatsiyasi Maxsus komissiyasidan O‘zbekiston fuqarolarining Sochi orqali olib chiqib ketilishiga ruxsat olish kechikkani bilan izohlagandi.
Rustam Kurganbayevning xabar berishicha, 23 oktabr kuni Moskvada Rossiya Federatsiyasi hukumati raisi o‘rinbosari Tatyana Golikova rahbarligida bo‘lib o‘tgan Maxsus komissiyaning navbatdagi yig‘ilishida Abxaziyada qolib ketgan o‘zbekistonliklarni Rossiya orqali O‘zbekistonga qaytarishga ruxsat berilgan.
«Kecha, 26 oktabr kuni ertalab fuqarolarimizning Abxaziya chegarasidan Rossiya hududiga o‘tishlariga va shu yerdan O‘zbekistonga charter reys bilan uchib ketishlariga ruxsat berilgani haqida Moskvadan xabar oldik. Bu xabarni o‘sha zahoti biz bilan aloqada bo‘lib turgan insonlar orqali Abxaziyadagi vatandoshlarimizga yetkazdim.
28 oktabr kuni Uzbekistan Airways kompaniyasining ikkita samolyoti yetib keladi. Shu kunning o‘zida 300 kishini O‘zbekistonga olib ketadi. O‘zim ham Sochi shahriga uchib ketyapman. Abxaziya–Rossiya chegarasiga yetib borib, fuqarolarimizni chegaradan olib o‘tish va samolyotlarga yetkazib qo‘yish ishlariga shaxsan bosh-qosh bo‘laman. O‘zbekistonliklar chegaradan to aeroportgacha bepul avtobuslarda yetkazib qo‘yiladi», – deydi Rustam Kurganbayev.
Ayni paytda Abxaziya–Rossiya chegarasida turgan surxondaryolik Rinat Yusupov Kun.uz bilan suhbatda bosh konsulning so‘zlarini tasdiqladi. Uning aytishicha, Abxaziyadagi vatandoshlar O‘zbekistonga uchta samolyotda olib ketilishi rejalashtirilmoqda.
