Suyultirilgan gaz ballonlari onlayn nazorat qilinadi

Bu tizim quyidagi tartibda amalga oshiriladi:

I bosqich — maishiy gaz ballonlariga maxsus shtrix kodli stikerlar o‘rnatiladi;

II bosqich — iste'molchilar ID kartalar bilan ta'minlanadi;

III bosqich — mazkur jarayonlar «Ye-gaz» onlayn tizimiga ulanadi.

Energetika vazirligi matbuot xizmati xabariga ko‘ra, iste'molchiga berilgan ID kartada barcha ma'lumotlar ko‘rinib turadi. Bu bilan endi narx-navoni asossiz oshirish muammosi bo‘lmaydi. 

Shu bilan birga, bu tizimda gaz ballon tarqatish oralig‘i 45 kun bo‘lsa, 45 kun ichida faqatgina bir marta pul yechib olinadi. Ya'ni 45 kun ichida ikkinchi bor gaz ballon olishning imkoni bo‘lmaydi.

Avtomatlashtirilgan tizimda belgilangan mablag‘ tegishli muddatda yechib olinadi. Ya'ni haydovchi-ekspeditor va ta'minotchi xodimlar tomonidan gaz ballon uchun qo‘ldan naqd pul olinishiga yo‘l qo‘yilmaydi. Bu suyultirilgan gaz ta'minotida ko‘rsatilayotgan xizmat sifatini yanada oshirib, tizimdagi korrupsiya holatlarini bartaraf etishga imkon beradi.