Davlat xizmatlari ko‘rsatishda Qarshi shahar tajribasi amalga oshiriladi

Adliya vazirligi, Mahalla va oilani qo‘llab-quvvatlash vazirligi va Qashqadaryo viloyati hokimligining davlat xizmatlari ko‘rsatishning yangicha zamonaviy uslublarini joriy etish va bu borada aholi bilan yaqindan ishlash yuzasidan quyidagilarni qamrab oluvchi Qarshi shahar tajribasini amalga oshirish to‘g‘risidagi taklifiga rozilik berilishi mumkin:

• mahalla fuqarolar yig‘inlari raislarining davlat xizmatlaridan foydalanish bo‘yicha bilim va ko‘nikmalarini oshirish maqsadida o‘quv seminarlari va press-turlar tashkil etish hamda “markaz-mahalla-fuqaro” tamoyili bo‘yicha Davlat xizmatlari markazlari orqali ko‘rsatib kelinayotgan xizmatlarning har bir oilaga kirib borishini ta'minlash;
• har bir mahallada yashovchi aholining davlat xizmatlariga bo‘lgan talabini va ehtiyojini joyiga chiqqan holda, jumladan manzilli ijtimoiy tadqiqotlar orqali chuqur tahlil qilish;
• davlat xizmatlarini ko‘rsatish jarayonida mavjud byurokratik to‘siqlar va qiyinchiliklar, muddatlarning uzoqligi va to‘lov miqdorlarining maqbulligini bevosita amaliyot va aholi tomonidan beriladigan baholar asosida tanqidiy o‘rganish, ushbu sohadagi muammolarni bartaraf etish bo‘yicha takliflar kiritish;
• Davlat xizmatlari markazi tomonidan bevosita mahallalarda sayyor xizmatlarni yo‘lga qo‘yish, aholini o‘z uyidan turib yoki mahalla markazlarida xizmatlarni olish imkoniyatlarini bosqichma-bosqich yaratish;
• aholi tomonidan davlat xizmatlarini olishdagi ko‘nikmalarini shakllantirish uslublarini tubdan qayta qo‘rib chiqish, bu borada aholi huquqiy madaniyatini keskin oshirish, onlayn xizmatlari olishni targ‘ib qilish va rag‘batlantirish choralarini ko‘rish;
• davlat organlari tomonidan ko‘rsatilayotgan xizmatlarning tartib-taomillarini oddiy va tushunarli va ko‘rgazmali ko‘rinishda bevosita mahalla aholisiga tushuntirish, keng qamrovli multimedia materiallarini ommaviy axborot vositalari va ijtimoiy tarmoqlar orqali tarqatish.

Qarshi shahrida amalga oshirilgan tajriba natijasida 2021 yil 1 fevraldan boshlab uning ijobiy natijalarini butun respublika bo‘yicha joriy etish choralari amalga oshirilishi belgilanadi.