Yakkabog‘dagi chigal masala: Prezident topshirig‘i asosida ajratib berilgan yerda tadbirkor o‘z faoliyatini boshlay olmayapti

Tadbirkor Elyor Qudratovning Kun.uz muxbiriga hikoya qilishicha, garchi ushbu hudud hujjat bo‘yicha bozorga qarashli bo‘lmasa ham (hokim qaroriga ko‘ra ajratilgan yer maydoni allaqachon kadastr idorasida ro‘yxatdan o‘tgan va Elyor Qudratov soliq to‘lab kelmoqda) ular ushbu yerga da'vogarlik qilishmoqda.

“Bozorga tegishli deyilayotgan ushbu yerga norasmiy egalik qilayotganlar menga “Agar yer kerak bo‘lsa — mendan sotib olasan”, deyishdi. Bunga ko‘nmaganimdan keyin, bir nechta yigitlar kelib, qurilish ishlariga xalaqit berib, janjal chiqarishga urinishdi”, — deydi E.Qudratov.

Masalaning huquqiy jihatiga to‘xtaladigan bo‘lsak, Vazirlar Mahkamasining “Tadbirkorlik va shaharsozlik faoliyatini amalga oshirish uchun yer uchastkalarini doimiy foydalanishga berishning zamonaviy va shaffof mexanizmlarini joriy etish chora-tadbirlari to‘g‘risida”gi 2018 yil 30 iyundagi №493-sonli qarorining 1-ilovasi bo‘lmish “Tadbirkorlik va shaharsozlik faoliyatini amalga oshirish uchun yer uchastkalarini elektron auksion orqali doimiy foydalanishga berish tartibi to‘g‘risida nizom”ning 2 -qismi “v” bandida “Ushbu Nizom talablari O‘zbekiston Respublikasi Vazirlar Mahkamasi bilan kelishgan holda O‘zbekiston Respublikasi Iqtisodiyot va sanoat vazirligi tomonidan aniqlangan ijtimoiy-iqtisodiy rivojlanishda orqada qolayotgan tumanlar va shaharlarda yer uchastkalari ajratishda tatbiq etilmaydi”, deb belgilab qo‘yilgan.

Ya'ni prezident o‘z tashrifida Yakkabog‘ tumanini ijtimoiy-iqtisodiy rivojlantirish uchun 50 gektar maydonda issiqxonalar barpo etishni vazifa qilib belgilagan.

Biz tahririyat nomidan Kadastr agentligi Qashqadaryo viloyati boshqarmasining Yakkabog‘ tuman filialiga murojaat etib, “Jambul” MFY hududidagi nizoli 6 ga yer maydoni kimga tegishli ekanligiga oydinlik kiritishni so‘radik.

Bizga ma'lum qilinishicha, 2009 yilgi tuman hokimi qarori davlat reyestridan o‘tmasdan faoliyat ko‘rsatib kelmoqda, tuman hokimining o‘sha qaroriga asosan shaxsiy mulk huquqida bo‘lgan yer va bino-inshootlar davlat ro‘yxatiga olish kitobida qayd qilinmagan, kadastr yig‘majildlari tayyorlanmagan. Anglashiladiki, ushbu hududda 11 yildan buyon tegishli hujjatlarsiz faoliyat ko‘rsatib kelinmoqda.

Qiziq, 6 gektar yerga da'vogarlik qilayotganlar 11 yil ichida shuncha maydon uchun soliq to‘ladimikan? Bu savolga Yakkabog‘ tuman davlat soliq inspeksiyasi javob bersa yaxshi bo‘lar edi.

Albatta, tadbirkorlar qo‘l qovushtirib o‘tirishgani yo‘q. Elyor Qudratov va boshqalar Qashqadaryo viloyati ma'muriy sudi apellyatsiya instansiyasiga murojaat qilishgach, viloyat ma'muriy sudi 2020 yil 12 noyabrda Yakkabog‘ tuman ma'muriy sudining 2020 yil 20 avgustda chiqargan hal qiluv qarorini bekor qilib, ishni qaytadan ko‘rib chiqish uchun Shahrisabz shahar ma'muriy sudiga yuborgan.

Elyor Qudratovning telefon orqali ma'lum qilishicha, Shahrisabz shahrida ko‘rilishi kerak bo‘lgan sud qandaydir yo‘l bilan yana Yakkabog‘ tumaniga ko‘chirilgan.

Qiziq vaziyat yuzaga kelyapti. Agar “Yakkabog‘ qurilish materiallari bozori” MChJ yer ajratilgan maydon o‘ziga tegishli ekanini faqat 2009 yilgi qaror bilan isbotlashga urinayotgan bo‘lsa, nega kadastr idorasi 11 yildan buyon MChJ tasarrufida hech qanday yer qayd etilmaganini bayon qilmoqda?

Agar MChJning yer maydoni tadbirkorlarga auksionsiz berilganiga e'tirozi bo‘lsa, nega ishni prokuratura emas, sud o‘rganmoqda?

Bu ishda adolatni kim yuzaga chiqara olar ekan? Tadbirkor Elyor Qudratov ishni avval ham ko‘rib chiqqan Yakkabog‘ tuman ma'muriy sudi bu gal adolatli bo‘la olishiga shubha bilan qaramoqda.

Shuhrat Shokirjonov, Kun.uz maxsus muxbiri