15:36 / 15.12.2020
7724
Босния ва Ҳерцеговина ҳукумати вакиллари Лавров билан учрашишдан бош тортишди

Россия ташқи ишлар вазири 15 декабр куни Босния ва Ҳерцеговина президуми вакиллари Милорад Додик, Шефик Жаферович ва Желко Комшич билан учрашув ўтказиши белгиланганди.

Фото: Коммерсантъ

Босния ва Ҳерцеговина ҳукумати вакиллари мамлакатга ташриф билан келган Россия ташқи ишлар вазири Сергей Лавров билан учрашишдан бош тортишди. 

Қайд этилишича, Россия ташқи ишлар вазири 15 декабр куни Босния ва Ҳерцеговина президуми вакиллари  Милорад Додик, Шефик Жаферович ва Желко Комшич билан учрашув ўтказиши белгиланганди. Аммо Жаферович ва Комшич у билан учрашишни истамаган.

Улар ушбу қарор бўйича берган расмий изоҳларида Лавровнинг 14 декабр куни Дейтон келишуви бўйича айтган қатор сўзларига қўшилмасликларини билдиришган. Президиум аъзоларининг сўзларига кўра, россиялик вазирнинг айтган гаплари Босния ва Ҳерцеговина позициясига мутлақо зиддир.

 Лавров 14 декабр куни Босния ва Ҳерцеговина президиумининг серб аъзоси Милорад Додик билан учрашув якунига бағишланган матбуот анжуманида айрим ғарб давлатлари Дейтон келишувини бузишга уринаётгани, бу жиддий салбий оқибатларга олиб келиши мумкинлигини айтганди. Унинг таъкидлашича, мамлакатда юзага келган барча муаммолар ушбу келишувга мувофиқ ва ташқаридан ҳеч кимнинг аралашувисиз ҳал қилиниши лозим.

Дейтон келишуви 1995 йил ноябрда Дейтон шаҳри яқинидаги Америка ҳарбий базасида имзоланган ҳамда Босния ва Ҳерцеговинадаги фуқаролар урушига чек қўйган.

Top