DW nashrining xabar berishicha, Markaziy saylov komissiyasi 4-oktabr, yakshanba kuni kechqurun ovoz berishning dastlabki natijalarini eʼlon qilgan. Saylovchilar mamlakat prezidiumi aʼzolari, markaziy va ikki mintaqaviy parlament deputatlari, shuningdek, Serb Respublikasi prezidentini tanlagan.
Byulletenlarning 95 foizi sanab chiqilgan paytda prezidiumda bosniyalik musulmonlar - bosnyaklar vakili boʻlish uchun kurashda Denis Bechirovich qariyb 38 foiz ovoz bilan yetakchilik qilgan. U bunga qadar prezidium raisi lavozimida faoliyat yuritgan.
Xorvatlar vakili uchun saylovda Dariyana Filipovich taxminan 48 foiz ovoz bilan oldinda boʻlgan. Serblar vakili sifatida esa amaldagi prezidium aʼzosi Jelka Sviyanovich qariyb 55 foiz ovoz toʻplagan.
Bosniya va Hersegovinada davlat rahbari vazifasini uch kishidan iborat prezidium bajaradi. Unda bosnyaklar, xorvatlar va serblar bittadan vakilga ega. Bu boshqaruv tizimi mamlakatdagi fuqarolik urushiga nuqta qoʻygan 1995-yilgi Deyton kelishuvlari asosida shakllangan.
Saylovdagi asosiy raqobatlardan biri Bosniya va Hersegovina tarkibidagi, aholisining asosiy qismini serblar tashkil etuvchi Serb Respublikasi prezidentligi uchun kechgan. Unda mintaqa bosh vaziri Savo Minich va muxolifat nomzodi Branko Blanusha bellashgan.
Dastlabki natijalarga koʻra, Minich aksariyat saylov okruglarida raqibidan oʻzib ketgan. Blanusha ayrim okruglarda ustun kelgan boʻlsa-da, Markaziy saylov komissiyasi maʼlumotlari umumiy hisobda Minich oldinda ekanini koʻrsatgan.
Minich ham, Sviyanovich ham Milorad Dodik asos solgan «Mustaqil sotsial-demokratlar ittifoqi» partiyasidan nomzod boʻlgan. Mazkur partiya Serb Respublikasi parlamenti - Xalq skupshtinasi saylovida ham yetakchilik qilmoqda. Mamlakat parlamentining quyi palatasiga saylovda ham bosniyalik serblarning aksariyati shu partiyani qoʻllab-quvvatlagan.
Dodik Minich va Sviyanovichni gʻalaba bilan tabriklashga ulgurgan. Nashrning qayd etishicha, Dodik 2025-yilda Bosniya va Hersegovina Konstitutsiyaviy sudi qarorlari hamda xalqaro kelishuvlarni bajarmagani uchun prezidentlik lavozimidan majburan chetlashtirilgan. Sud unga olti yil davomida siyosiy faoliyat bilan shugʻullanishni ham taqiqlagan.
Rossiyaga yaqinligi bilan tanilgan Dodik sud qarorini tan olmagan va qoʻllab-quvvatlash izlab Moskvaga borgan. U Savo Minich bilan birga 29-sentabr kuni Kremlda Vladimir Putin bilan uchrashgan.
