15:11 / 18.12.2020
7055
«Бу фикрга қисман қўшиламан» — Норбоева блогернинг қонун ҳужжатлари ҳақидаги постига муносабат билдирди

Сенат раиси Танзила Норбоева блогер davletovuz томонидан қолдирилган постга нисбатан ўз фикрини билдирди.

«Ҳозир халқимиз бизни ижтимоий тармоқлар орқали кузатиб туришибди. Бир қанча саволлар келиб тушган, ҳурматли журналист ва блогерларимиз томонидан фикр-мулоҳазалар билдирилган.

Мана битта фикр билдирилганки, «яқинда бир даврада сўнгги 4 йилда 10 мингдан ортиқ қонун ҳужжати қабул қилингани, бу мустақиллик йилларида қабул қилинган қонун ҳужжатларининг 30 фоизи экани қайд этилди. Бу қувонтирадиган рақам эмас. Уларнинг орасида бир-бири билан мос тушмайдиган, инкор қиладиган ҳужжатлар ҳам талайгина», деган фикр билдирилган.

Мен бу фикрга қисман қўшилмайман. Қайсидир қисмига балки қўшиларман, лекин қисман қўшилмайман. Чунки умуман олганда [қонун ҳужжатларининг] 30 фоизи мана шу сўнгги тўрт йилга тўғри келаётган бўлса, бу Ўзбекистоннинг қанчалик ривожланаётганидан далолат беради. Олдинлари ушлаб турилган, қандайдир чора-тадбирларни қилиш керак бўладиган, соҳаларни ривожлантириш керак бўладиган йўналишлар ривожланмасдан келганидан ҳам далолат беради. 30 фоизи тўрт йилдан бери. Демак, жамиятимиз ижтимоий-иқтисодий соҳада жадал ривожланяпти. Биз буларнинг қонуний асосларини яратишимиз керак. Шунинг учун ҳам мана шу 30 фоиз тўғри келяпти.

Иккинчи қисмига мен қисман қўшиламан деганим, биринчидан, бир-бирига мос келмайдиган, инкор қиладиган ҳужжатлар ёки ҳужжатлар ичидаги нормалар мавжуд. Буни биз қабул қиламиз. Бу борада кириш гапимда ҳам айтиб ўтдимки, Сенат мана шу йилнинг ўзида, йил бошидан буён 30та қонун ҳужжатларининг ҳаммасини таҳлил қилиб чиқди.

Биласизлар, бизнинг қошимизда Қонунчилик муаммолари институти бор. Мана шу институт билан ҳамкорликда биз бу йўналишда жуда катта ишларни олиб боряпмиз. Бу ишлар қуйи палатада ҳам олиб бориляпти. Адлия вазирлигида ҳам гильотина деган йўналишда эски қонун ҳужжатларини бекор қилиш бўйича иш кетяпти. Улар бу тўғрисида ўз ҳисоботларида айтиб ўтишади.

Айтмоқчиманки, бу борада Ўзбекистонда иш бошланган. Бир-бирини такрорлайдиган нормаларни бекор қилиш ёки қонунлар, қонуности ҳужжатларини ҳам бекор қилиш бўйича ишлар олиб бориляпти. Бу аянчли ҳолат дейилгани тўғри. Лекин биз бунинг устида иш бошладик. Шунинг учун ҳурматли ҳамюртларимиз, Олий Мажлис Қонунчилик палатаси ҳам, Сенати ҳам бу масалага эътиборсиз деб ўйламанглар. Биз бу масалаларни қатъий назоратга олганмиз», дея Танзила Норбоеванинг сўзларини келтирмоқда Kun.uz мухбири.

  • 17 декабрь куни Kun.uz сайтида «Депутатлар суд қарори устидан кассация шикоятини келтириш ҳуқуқини чекловчи қонунларни қабул қилди. Бундан мақсад нима?» сарлавҳали мақола эълон қилинган, унда Қонунчилик палатаси қабул қилган ва маъқуллаш учун Сенатга жўнатилган қонунларда эндиликда шахснинг суд қарори устидан кассация шикояти келтириш ҳуқуқи чекланиши эҳтимоли борлиги ҳақида айтилганди.
  • 18 декабрь куни Davletovuz канали муаллифи ушбу ҳолат юзасидан муносабат билдириб, айрим қонун лойиҳалари жамоатчилик муҳокамасидан ўтказилмаслигига эътироз билдирганди.
Top