BMTda dunyo aholisining asosiy ehtiyojlari ma'lum qilindi 

BMT dunyodagi odamlar sog‘liqni saqlash, ta'lim, toza suv va sanitariya vositalariga eng ko‘p ehtiyoj sezayotganlarini ma'lum qildi. Bundan BMTning “BMT-75: Global muloqot” tadqiqoti bo‘yicha tayyorlangan ma'ruzasi darak bermoqda. 

Tadqiqot davomida 193ta davlatdan 1,5 mlndan ko‘proq kishi ishtirokida so‘rovnoma o‘tkazilgan.  

“Pandemiya taraqqiyot borishini o‘zgartirgani va tengsizlikni kuchaytirgani sababli so‘ralganlar qisqa muddatli istiqbolda ustuvor ehtiyojlar sifatida asosiy ehtiyojlar - sog‘liqni saqlash, ta'lim, sanitariya vositalari va toza suvni aytishgan”, deyilgan hujjatda. 

Bundan tashqari, respondentlar iqlim o‘zgarishi va atrof-muhitning ifloslanishini asosiy tahdidlar deb atashgan. Bunday fikrni asosan Lotin Amerikasi va Karib havzasi aholisi bildirgan.

So‘ralganlarning 49 foizi 2045 yilga qadar turmush tarzi yaxshilanishiga ishonishlarini aytishgan. Bunday fikrni kam rivojlangan va ixtiloflar kechayotgan davlatlar aholisi aytgan.

2020 yil dekabrida BMTda 2021 yilda dunyoda qancha odam insonparvarlik yordamiga muhtojlik sezishi prognoz qilingandi. BMTning insonparvarlik masalalarini muvofiqlashtirish boshqarmasi hisob-kitoblariga ko‘ra, yangi yilda 235 mln kishiga oziq-ovqat va boshqa turdagi insonparvarlik yordami zarur bo‘ladi. 

Shu tariqa, insonparvarlik yordami dunyo aholisining har 33-vakiliga talab etiladi. 2020 yilda bunday yordamga har 45-kishi muhtoj bo‘lgan. Bundan esa insonparvarlik yordamiga muhtoj odamlar soni 40 foizga ko‘paygani kelib chiqadi. Bunday salbiy tendensiya bir qator omillar, jumladan pandemiya, mahalliy ixtiloflar, majburiy migratsiya va global isish oqibatlari bilan bog‘langan.