Kun o‘yinlari anonsi: Angliyada Pep va Klopp to‘qnashuvi, Italiyada «Yuventus» milanliklarni quvishda davom etadi

ASTON VILLA – ARSeNAL (6 fevral, 17:30)

So‘nggi bir oyda «Arsenal»ning natijalari sezilarli yaxshilangan bo‘lsa-da, jamoa butunlay barqaror yo‘lga tushib oldimi yoki bu hali yolg‘onchi tasavvurmi, payqash oson bo‘lmayapti. Qatorasiga to‘rt g‘alabadan so‘ng, «Kristal Pelas» bilan durang va Angliya kubogidan chiqib ketish ro‘y berdi. «Yunayted» bilan durang hech qanday savolga javob bermagan bo‘lsa, «Vulverhempton» safarini ham shunday o‘yinlar toifasiga kiritish mumkin, zero bu o‘yinning birinchi bo‘limini «Arsenal» to‘liq ustunlikda o‘tkazgan, hisobni ochgan, faqat bo‘limga qo‘shib berilgan daqiqalarda Luizning qizil kartochka olishi va penaltiga sababchi bo‘lishidan so‘ng, barchasi o‘zgarib ketgandi. Hozir esa, Arteta shogirdlari shunday chegarada turibdilarki, fevraldagi o‘yinlar jamoani yo yevrokuboklar uchun kurashga qo‘shadi, yoki butunlay o‘rtamiyonaga aylantiradi. Ha, bir paytlar ingliz top-klublari uchun Yevropa Ligasi yarashmasdi, ammo hozir, Angliyada kuchli jamoalar ko‘paygan paytda, har doim ham Yevropa Chempionlar Ligasi ochiq emas. Bir paytlar Arsen Vengerning doimiy to‘rtinchi o‘rni ustidan kulishgan bo‘lsa, hozirda bu o‘rin uchun jamoa ancha muvaffaqiyatli mavsum o‘tkazishi shart.

«Aston Villa» o‘tgan yilning oxirigacha ancha kuchli o‘yin namoyish etgan, hatto bir muddat yo‘qotilgan ochkolar borasida peshqadam ham edi. Ammo qatorasiga ikki o‘yini koronavirus tufayli qoldirilishi jamoaning o‘sha ritmini yo‘qotib qo‘ydi. «Manchester Siti» kabi jamoalar uchun tanaffus ayni muddao, bu muddatda dam olish va kerakli tuzatishlarni amalga oshirish imkoniyati yuzaga keladi. Ammo bir tarkib bilan yuqori kayfiyat va ritmda muvaffaqiyat bilan ketayotgan «Aston Villa» uchun hammasi teskari ishladi. To‘g‘ri, raqiblar ham anoyi emasdi – «Manchester Yunayted», «Chelsi», «Manchester Siti», so‘nggi o‘yinlarda yaxshi formaga kirgan «Vest Hem»...

O‘yin oldidan mezbonlarda yo‘qotishlar yo‘q. «Arsenal»da esa, Mari, Tirni, Gabriyel kabi yo‘qotishlar yetmagandek, o‘tgan turda Luiz va Leno diskvalifikatsiyaga uchradi. Runarssonning ancha ishonchsiz o‘ynashini e'tiborga olsak, aynan germaniyalik posbonning yo‘qligi ko‘proq bilinsa kerak.

Darvoqe, birinchi davrada «Old Trafford»dagi g‘alabadan so‘ng, «Arsenal» o‘z maydonida aynan «Villa»ga 0:3 hisobida mag‘lubiyatga uchragan va shu tariqa londonliklarning sakkiz o‘yindan iborat g‘alabasiz seriyasi boshlangandi.

YuVeNTUS – ROMA (6 fevral, 22:00)

«Yuventus»ning so‘nggi yillardagi chempionlik mavsumlarida har doim ham oson bo‘lmagan. Masalan, Sarrining «Napoli»si bilan so‘nggi turgacha davom etgan poygani eslash mumkin. Ammo bu safargisi biroz boshqacha. O‘shanda ikki jamoa deyarli ochko yo‘qotmasdan manzil tomon yurishgan bo‘lsa, hozir har qanday o‘yinda, har qanday jamoa ochko yo‘qotishi mumkin – bu esa chempionatni yanada qizdiradi. «Yuventus» bu mavsumda «Fiorentina», «Benevento», «Verona», «Krotone» kabi jamoalar bilan o‘yinlarda ochko yo‘qotib ulgurdi. Bunday sharoitda Milan jamoalari «Roma»dan umid qilishlari ancha mantiqli holat.

Ha, biroz paradoksal bo‘ldi, chunki hozirda «Yuve» emas, aynan «Roma» peshqadamlarga yaqinroq turibdi va g‘alaba qozonsa, masofani qisqartirishi mumkin. Qizig‘i, «Roma» aynan top-raqiblarga qarshi o‘yinlarni juda shiddatli va murosasiz o‘tkazmoqda. «Milan» bilan ham (3:3), «Inter» bilan ham (2:2) jangovar durangga imzo chekilgan. Birinchi davrada «Yuventus» bilan o‘yin ham 2:2 hisobida tugagan – ikki marta Veretu mezbonlarni oldinga olib chiqqan bo‘lsa, har ikki safar ham Krishtianu Ronaldu hisobni tenglashtirgandi. Turindagi oxirgi o‘yin esa, 1 avgust kuni «Roma»ning 3:1 hisobidagi g‘alabasi bilan tugagandi (koronavirus tufayli cho‘zilgan o‘tgan mavsum doirasida).

«Sampdoriya»ga qarshi o‘yinda navbatdagi sariq kartochkasini olgani uchun Bentankur mezbonlarga yordam bera olmaydi. Shuningdek, Dibalaning fevralda safga qaytishi aytilgan bo‘lsa-da, hali darak yo‘q. «Roma» tarkibida Kris Smollingning maydonga tushishi so‘roq ostida. Mehmonlar tarkibida ham diskvalifikatsiya qilingan futbolchi bor – oxirgi ikki g‘alabali o‘yinda bir gol va ikki assistni amalga oshirgan Lorenso Pellegrini keraksiz sariq kartochka ishlab ham olgandi.

MANCheSTeR YuNAYTeD – EVeRTON (7 fevralga o‘tar kechasi, 01:00)

Agar Sulsherdan «Yunayted»ni boshqarayotgan davrdagi eng alamli mag‘lubiyatini so‘rasangiz, «Everton»ga qarshi dastlabki uchrashuvni (0:4) yodga oladi. Murabbiy uchun bu juda og‘riqli kechgandi. Keyin ham «Everton» Sulsher uchun ancha vaqt o‘tmas dovon bo‘lib qoldi, o‘tgan mavsumda har ikki o‘yin 1:1 hisobida yakunlandi. Faqat bu mavsumga kelibgina, birinchi davrada 3:1 hisobida g‘alaba qozonildi. Keyin Liga kubogi bahsida ham 2:0 hisobida «iblislar»ning qo‘li baland keldi.

Eslangan har ikki o‘yin «Guddison Park»da bo‘lgan. Qizig‘i, «Everton» barcha musobaqalardagi oxirgi 5 mag‘lubiyatini aynan o‘z maydonida qabul qilgan. Ayniqsa, «Vest Hem» va «Nyukasl»dan uchralgan mag‘lubiyatlar Anchelotti jamoasini peshqadamlar guruhidan tushirib yubordi. To‘g‘ri, «Everton» boshqalardan ikki o‘yin kam o‘tkazgan, masalan, yo‘qotilgan ochkolar bo‘yicha jamoa bugungi raqibidan atigi 2 ochko orqada, xolos. Ammo qoldirilgan o‘yinlardagi raqiblar «Aston Villa» va «Manchester Siti», buning ustiga, agar «Old Trafford»da ham ochko yo‘qotilsa, tabiiyki, Chempionlar Ligasi yo‘llanmasi uchun imkoniyat ancha tushib ketadi.

Tarkiblarga kelsak, Sulsher faqat Bayining maydonga tushishi so‘roq ostida ekanini, o‘tgan o‘yinda almashtirilgan Kavani esa, deyarli tayyorligini aytib o‘tdi. «Everton»da ham yo‘qotishlar ko‘p emas, faqat asosiy darvozabon Pikford hali tayyor emas. Bir tarafdan bu liverpulliklar foydasiga ishlashi ham mumkin, chunki Ulsen maydonga tushgan o‘yinlarda ancha ishonchliroq harakat qilyapti. Lidsdagi g‘alabada ham yetti seyvni amalga oshirgan shvetsiyalik darvozabon asosiy qahramonlardan biri bo‘lgandi.

«Everton»ga boshqa bir jihat pand berishi mumkin. «Manchester Yunayted» oldingi tur o‘yinini bir kun oldin, seshanba oqshomida o‘tkazdi va bu Sulsher shogirdlariga qo‘l kelishi mumkin. Buning ustiga «Yunayted» o‘sha o‘yinda 9:0 hisobida g‘alaba qozondi, bir kishi kam bo‘lgan raqibga qarshi o‘ynadi, o‘yin davomida kam kuch sarflab, ba'zi yetakchilarga dam berdi ham. «Everton» esa «Lids» bilan o‘yinda ancha ter to‘kishiga to‘g‘ri kelgani shubhasiz.

LIVeRPUL – MANCheSTeR SITI (7 fevral, 21:30)

Uch yildan buyon ilk marta bu jamoalar o‘zaro o‘yin paytida turnir jadvalida qo‘shni emas. Oradagi farq ham, agar yo‘qotilgan ochkolar bo‘yicha hisoblansa, 10taga yetgan bo‘lsa-da, aynan mana shu turnir nuqtayi nazaridan ham juda ahamiyatli pallada bo‘lib o‘tmoqda uchrashuv. Boshqa paytlarda, balki jamoalar o‘zaro durang o‘ynab, kurashni sirtdan olib borishga qarshi bo‘lishmasdi, lekin hozir har ikkisiga ham g‘alaba suv va havodek zarur payt.

«Liverpul» yuqorida tilga olingan masofani qisqartirish uchun bor kuchini tashlashi shart. Zero, farq kattalashsa yoki saqlanib qolsa ham, qatorasiga 13 o‘yindan beri g‘alaba qozonayotgan «Manchester Siti»ga yetib olish imkonsiz bo‘lib qoladi.

«Manchester Siti» esa raqiblarning muvaffaqiyatsiz davridan foydalanib, qulay joylashib oldi. Oldinda esa «Liverpul», «Tottenhem» va «Arsenal»ga qarshi o‘yinlar kutib turibdi. Bu uchrashuvlardan so‘ng ham, hozirgi pozitsiyani va masofani saqlash juda muhim bo‘lib turibdi. Birinchidan, keyin Chempionlar Ligasi boshlanadi, tig‘iz taqvimda har qanday pasayishga tayyor turish kerak. Ikkinchidan, koronavirus davrida kutilmagan muammolarning paydo bo‘lishi, aytaylik, yetakchi futbolchilarning kasallanib qolish ehtimoli ham bor.

«Liverpul» lazareti hamon to‘la. Alisson, Fabino va Mane mashg‘ulotlarga qaytgani aytilayotgan bo‘lsa-da, Gomes, Jota, Keyta, Matip kabi futbolchilar bu o‘yinga tayyor bo‘la olmasliklari aniq. Mehmonlarda esa, De Bryuyne va Ake hali tiklanmagan, Aguero jarohatidan forig‘ bo‘lsa-da, muhim o‘yinga qay darajada tayyorligi ma'lum emas. Pep Gvardiola so‘nggi o‘yinlarda ish berayotgan sxemani buzmasdan, Silva, Sterling, Gundo‘g‘anning navbati bilan «to‘qqizlik»ka aylanishlaridan voz kechmay tursa kerak.

Tarkib tanlashda Yurgen Klopp oldida ham o‘ziga yarasha dilemma bor. Ma'lumki, klub transfer oynasining so‘nggi kunida O‘zan Kabak va Ben Devis kabi markaziy himoyachilarni sotib oldi. Kloppning aytishicha, futbolchilar jamoaga qo‘shilishgan va nazariy tushunchalar bilan ham tanishtirilgan. Savol tug‘iladi, so‘nggi o‘yinlarda yarim himoyaning yetakchisiga aylangan Tiago Alkantara to‘p nazoratiga asoslangan «Siti»ga qarshi ham o‘sha funksiyada qoladimi yoki doimgidek, Pepga qarama-qarshi uslubni tanlaydigan murabbiy Hendersonni yarimhimoyaga qaytaradimi? Agar ikkinchi variant tanlansa, APL uchun yangi bo‘lgan himoyachilar ilk o‘yinda talabga javob bera oladilarmi?

BeTIS – BARSeLONA (8 fevralga o‘tar kechasi, 01:00)

Qatorasiga besh g‘alaba, odatiy mavsumlarda Ispaniya chempionati peshqadamiga aylantirar, kamida chempionlik poygasidagi imkoniyatlarini yaxshilardi. Hozirchi? Kuman jamoasi qatorasiga shuncha g‘alabaga erishdi va bu faqat «Real»ga yetib olishni ta'minladi. «Atletiko» bilan farq esa, 10 ochko. Buning ustiga Simeone shogirdlarida bitta zaxira o‘yini ham bor. Mana shu faktning o‘zi bu mavsumda «Atletiko» naqadar barqaror ekanini ko‘rsatadi. Jamoa ham «Real» va ham «Barselona»ning inqiroziga shu qadar tayyor ekani tahsinga sazovor albatta, ammo «Atletiko»ning bu grafigi haqiqiy chempionlik yo‘li – bunday tempda eng yaxshi «Real» va «Barselona» bilan ham «Atletiko» chempionlik uchun kurashgan bo‘lardi.

Kumanning vazifasi esa, ma'lum, turnirdagi vaziyatdan qat'i nazar, uning shogirdlari har o‘yinda g‘alaba uchun maydonga tushishlari, shu bilan birga, o‘yindagi qandaydir o‘sish va ijobiy jihatlarni namoyish etishlari lozim. Murabbiy shu orqali futbolchilar oldida ham, bo‘lajak rahbariyat oldida ham ishonchni paydo qiladi. Aks holda u salkam yigirma yillik orzusidan bir yildayoq ayrilib qolishi mumkin. Katta ehtimol bilan avlodlar almashinuvini boshlab, yangi davrga kirib boradigan «Barselona» bu ishni aynan Kuman bilan qila olishlariga ishonishlari shart.

«Betis» bilan o‘yin anonsga kiritilganining ham sababi bor. Birinchidan, andalusiyaliklar ayniqsa, o‘z maydonlarida har qanday raqibga qarshilik qila oladigan auraga egalar. Ikkinchidan, «Betis» hozir yaxshi sport formasiga kirib oldi, 2021 yildagi barcha 9 o‘yinini mag‘lubiyatsiz o‘tkazdi. Uchinchidan, jamoa tarkibida bir qator qiziqarli futbolchilar bor, masalan, sobiq «barsachilar» – Bravo, Bartra, Montoyya, Telo, «Real» tarbiyalanuvchisi Serxio Kanales kabi futbolchilar uchun ortiqcha motivatsiyaning keragi yo‘q. Mezbonlar murabbiyi Manuel Pellegrinining ham Madrid bilan bog‘liq tarixi bor.

Mezbonlar safida yuqorida tilga olinganlar ichida Bravo va Bartraning maydonga tushishi so‘roq ostida, shuningdek, Kamarasa va Laynes ham jarohatlanganlar safida. «Barselona» esa, Pike va Koutinodan tashqari, Serjio Roberto yordamidan ham foydalana olmaydi.

Uchrashuvning yana bir o‘ziga xos jihati shundaki, xar ikki klub ham hafta o‘rtasida shu og‘ir kubok o‘yinida maydonga tushdi va 120 daqiqadan o‘yin o‘tkazdi. «Barselona» faqat qo‘shimcha bo‘limlarda «Granada» ustidan 5:3 hisobida ustun kelgan bo‘lsa, «Betis» faqat penaltilar seriyasida «Atletik»ka mag‘lub bo‘ldi. Raqiblarning jismonan optimal holatda emasliklari ham o‘yinda xatolar sonini, shundan, gollar sonini ham ko‘paytirsa, ne ajab.

Bonus: JYeNOA – NAPOLI (7 fevralga o‘tar kechasi 00:45) 

Eldor Shomurodov Italiyada navbatdagi top-raqibga qarshi maydonga tushishi mumkin. «Jyenoa» so‘nggi paytlarda, xususan, A Seriyadagi oxirgi 4 o‘yinda mag‘lubiyatga uchramadi va uch bor g‘alaba qozondi. Ungacha xavfli zonada bo‘lgan jamoa uchun bu juda katta qadam va natijada «Jyenoa» ochkolar sonini 21taga yetkazib, 18-o‘rindan 6 ochkoga ilgarilab ketdi. Bu o‘yinlarda Eldor gol ura olmagan bo‘lsa-da, aksariyat samarali hujumlarda faol ishtirok etdi. Umid qilamizki, aynan shu o‘yinda hamyurtimiz golsiz seriyasiga barham beradi.

BOShQA O‘YINLAR

6 fevral. ATALANTA – Torino (19:00), Frayburg – BORUSSIYa D (19:30), Shalke – LeYPsIG (19:30), Ueska – ReAL (20:15)

7 fevral. TOTTeNHEM – Vest Bromvich (17:00), Vulverhempton – LeSTeR (19:00), MILAN – Krotone (19:00), Sheffild – CheLSI (8 fevralga o‘tar kechasi, 00:15), Marsel – PSJ (01:00)