Hafta o‘yinlari anonsi: Angliyada Gvardiola va Mourino to‘qnashuvi, Ispaniyada «Real» «Valensiya»dan qasos olmoqchi
|18:36 / 13.02.20219 50917 min
Bahor yaqinlashib odatiy rejimiga qaytayotgan va Milan klublarini ta'qib qilishni boshlagan «Yuventus» navbatdagi sinovdan o‘ta oladimi? Brendan Rojyers sobiq klubini kuchli to‘rtlikdan uloqtirib yuborishga qodirmi? «Manchester Siti»ni oxirgi marta mag‘lub etgan klub bu ishni yana bir bor uddalay oladimi? «Atletiko»ning qoqilishi tasodifmidi? Ushbu dam olish kunlari juda ko‘p qiziqarli savollarga yanada qiziqarliroq o‘yinlar orqali javob olamiz.
Foto: Michael Steele, Chris Brunskill, Getty ImagesFoto: Michael Steele, Chris Brunskill, Getty Images
LeSTeR – LIVeRPUL (13 fevral, 17:30)
Aytish mumkinki, o‘tgan turdagi mag‘lubiyatdan so‘ng, «Liverpul» chempionlik poygasidan chiqib ketdi, zero 10 ochkolik farq, buning ustiga «shaharliklar»da bir o‘yin zaxirasi borligini e'tiborga olsak, bu farqni yo‘qqa chiqarish uchun «Liverpul»ning mukammal o‘ynashi kifoya qilmaydi. Endi «Manchester Siti»ning o‘ziga biror nima bo‘lishi kerak. Ikki yillik tanaffusdan so‘ng «Liverpul» yana eski dunyoga qaytmoqda – Chempionlar Ligasi yo‘llanmasi uchun kurashish. Bu rejim albatta, yengilroq, raqiblar ham «Siti» qadar barqaror emas, ammo ushbu o‘yindagi qoqilish bu kurashda ham jamoani qiynab qo‘yadi – birato‘la ikki jamoa «Liverpul»ni quvib o‘tishi mumkin. Umuman, «Lester» maydonidagi ochko yo‘qotish «Liverpul»ni yo‘qotilgan ochkolar bo‘yicha sakkizinchi o‘ringa tushirib yuborishi ehtimoli bor, buyog‘i endi hazil emas.
«Lester» ham o‘ziga yarasha mas'uliyatli davrda turibdi. Esingizda bo‘lsa, o‘tgan mavsumda ham jamoa fevralgacha kuchli uchlikda borgan, ammo keyin pasayish ro‘y berib, yakunda beshinchi o‘rinni olishgandi. Ruhiy jihatdan bu albatta, o‘z ta'sirini o‘tkazadi, ayniqsa, quyidan «Liverpul» va «Chelsi» quvib kelayotgandagi bosimni yengish oson emas. Xullas, bu o‘yin Rojyers shogirdlari uchun ham o‘ziga bo‘lgan ishonchni qaytarish, ham «Liverpul»ni yanada chuqurroqqa itarish uchun ayni muddao. Axir «Lester» oxirgi uch o‘yindan beri «Liverpul»ni yenga olmayapti, so‘nggi ikki o‘yin esa, Kloppning umumiy 7:0 hisobidagi ikki yirik g‘alabasi bilan yakunlangan.
«Liverpul»da jarohatlar sindromi davom etmoqda, Fabino yana jarohatlanganlar safiga qaytgan. Nabi Keyta va Jota mashg‘ulotlarga qaytayotgani aytilsa-da, oy oxirlarigacha ularni maydonda ko‘ra olmaymiz. Mezbonlar safida esa Ayoze Peres ikki haftaga safdan chiqdi. Ammo Jyeymi Vardining asta-sekin formaga qaytmoqda.
«Liverpul»ning so‘nggi ikki o‘yindagi ketma-ket mag‘lubiyatidan tashqari, diqqatni jamlashda muammo tug‘dirishi mumkin bo‘lgan omillar bor. Birinchisi, kuni-kecha Yurgen Kloppning onasi vafot etdi va murabbiy karantin cheklovlari tufayli Germaniyaga ta'ziya marosimiga bora olmadi. Ikkinchisi, bu o‘yindan uch kun o‘tiboq, jamoa Chempionlar Ligasida «Leypsig»ga qarshi muhim o‘yinda maydonga tushadi. Mavsum boshidan Superkubok, Liga kubogi, Angliya kubogi va katta ehtimol APL kubogini boy berib bo‘lgan liverpulliklar sovrin yutish uchun so‘nggi imkoniyatni qo‘ldan chiqarmasliklari kerak.
MANCheSTeR SITI – TOTTeNHEM (13 fevral, 22:30)
«Manchester Siti»ning 15 o‘yindan iborat g‘alabali seriyasi, 22 o‘yinli mag‘lubiyatsiz yurishi haqida ko‘p gapirilmoqda. «Siti» hozirgi tasavvurlarga shu darajada o‘rgatib qo‘ydiki, bu yurish aslida qayerdan boshlanganini unutib ham qo‘ydik. Eslaymiz – «Tottenhem» Gvardiola jamoasi ustidan 2:0 hisobida g‘alabaga erishdi va aynan shu o‘yindan so‘ng, Pep turli eksperimentlarga chek qo‘yib, natija uchun o‘ynashni boshladi. Chunki jamoa turnir jadvalining ikkinchi yarmiga tushib ketgan, peshqadamlar bilan oradagi farq oshib borardi. Pandemiya futboli davrida yuqori tempni ushlab turish futbolchilarga qiyin bo‘lishini tushungan murabbiy keyingi o‘yinlarga ancha pragmatik yondasha boshladi. Hatto «Old Trafford»dagi o‘yinda 0:0 hisobi Pepni qoniqtirganda ko‘pchilik tushunmay qolgandi ham. Uyog‘i ma'lum: yuqorida eslangan 22 o‘yinda «Manchester Siti» atigi 6 gol o‘tkazib yubordi, xolos. Faqat «Vest Bromvich» bilan o‘yinda o‘tkazilgan gol jamoaga qimmatga tushdi (1:1), qolgan 5 gol g‘alabali o‘yinlarda qo‘yib yuborilgan javob gollari edi. Endi esa, Manchesterga Londonning eng zo‘r «avtobusi» tashrif buyurmoqda. Xo‘sh, g‘alabali seriya boshlangan nuqtada turgan «Tottenhem» aylanani yopa oladimi?
Mavzuga oid
Afsuski, so‘nggi paytlarda «Tottenhem» muammolar girdobida qoldi. O‘yin borasida avval ham Mourino alohida maqtana olmasdi, ammo tanlangan to‘g‘ri rejalar, Son va Keyning yuqori saviyadagi o‘yinlari natijasida londonliklar turnir jadvalida ancha yuqorida borishgandi. Keynning jarohati «Tottenhem»ning qatorasiga uch mag‘lubiyatiga sabab bo‘ldi. Nihoyat u qaytdi va oxirgi turda «Vest Bromvich» mag‘lub etildi. Angliya kubogi bahsida yakunda mag‘lubiyatga uchralgan bo‘lsa-da, jamoa 4 gol urishga muvaffaq bo‘ldi («Everton» bilan o‘yinda 4:5). Demak, avvalgi bog‘lamlar ishlashni boshladi va bu faraz isbotlanishi kerak bo‘lsa, «Manchester Siti» raqib sifatida juda mos.
Katta ehtimol bilan mehmonlar besh himoyachi bilan to‘p suradi. Bu sxemada literal sifatida Ore va Regilon juda mos futbolchilar bo‘lishardi. Ammo ularning har ikkisi ham jarohat olgan. Devis va Doerti yaxshi himoyachi bo‘lishsa-da, aynan tezkor qarshi hujumlarni tashkil qilishda oldin tilga olingan nomlar kuchliroq edi. «Manchester Siti» tarkibida esa uzoq muddatga safdan chiqqan va qaytishi kutilmayotgan futbolchilardan tashqari yo‘qotishlar yo‘q. Birgina Serxio Aguero borasida aniq ma'lumotlar berilmadi, u hech bo‘lmasa zaxira o‘rindig‘ida paydo bo‘lib qolish ehtimoli mavjud.
Aytish mumkinki, kelayotgan bir hafta «Manchester Siti»ning navbatdagi chempionlik yo‘lidagi muhim qadamlari bo‘ladi. «Tottenhem»dan so‘ng, keyingi haftada yana ikki o‘yin – «Everton» va «Arsenal»ga safarlar kutib turibdi. Agar mana shu uch o‘yindan ham Gvardiola shogirdlari yo‘qotishlarsiz chiqa olishsa, raqiblarning eng optimist muxlislari ham ularning taxtdan tushishlariga ishonishmasa kerak.
NAPOLI – YuVeNTUS (13 fevral, 22:00)
Kuzda Neapoldagi koronavirus xavfi tufayli jamoa Turinga kela olmagan, natijada texnik mag‘lubiyat yozilgandi. Lekin «Napoli» sudda yutib chiqdi va o‘sha o‘yin qayta o‘tkaziladigan bo‘ldi. Yanvar oyi oxiriga belgilangan uchrashuv «Yuventus»ning kubok uchun maydonga tushishi tufayli yana noma'lum muddatga qoldirildi. Hozircha qachon o‘tkazilishi noma'lum bo‘lgan takroriy o‘yindan avval ikkinchi davra o‘yinini ko‘rishga muvaffaq bo‘lamiz. Milanliklarni quvishda davom etayotgan «Yuventus» va kuchli to‘rtlikka kirish uchun harakat qilayotgan «Napoli» shanba oqshomiga mazmun olib kiradi.
A Seriyadan tashqari, yaqinda raqiblar Italiya superkubogi uchun orani ochiq qilgandi. 21 yanvar kuni bo‘lib o‘tgan o‘yinda «Yuventus» Ronaldu va Morataning gollari evaziga 2:0 hisobida ustun kelgandi. O‘sha o‘yindan so‘ng ham «Yuventus» zafarli yurishini davom ettirmoqda. SPAL va «Inter» dog‘da qoldirilib, kubok finaliga chiqildi, shuningdek, A Seriyada qatorasiga uch o‘yinda bir xil – 2:0 hisobida g‘alaba qozonildi. «Napoli» esa aksincha, kubokda «Atalanta» dovoni oshib o‘tilmaganidan tashqari, oxirgi o‘yinda «Jyenoa» ham yaraga tuz sepdi – 1:2.
«Napoli»ning bu muvaffaqiyatsizliklarida albatta, himoya chizig‘idagi muammolar asosiy sabab bo‘lishi mumkin. Kulibali va G‘ulom virusga chalinib safdan chiqishgan, shuningdek, Manolas va Husay ham kamida kelasi oy boshlarida qaytishadi. Bularning barchasi asosiy himoyachilar edi. Mehmonlar safida esa Remzi, Artur, Bonuchchi va Dibala maydonga tusha olishmaydi. «Yuventus» kelasi hafta boshida «Portu» bilan Chempionlar Ligasida bahslashishi kerakligini ham e'tiborga olish lozim. «Napoli» ham yevrokubokda qatnashadi, lekin maqomi sal pastroq bo‘lgan Yevropa Ligasida. Gattuzo shogirdlari «Granada»ga qarshi maydonga tushishadi.
Statistika aniq bir o‘yinga qay darajada ta'sir ko‘rsatadi, ishonish qiyin-u, lekin bu jamoalar o‘rtasidagi so‘nggi 9 o‘yinda durang qayd etilmagan.
ReAL – VALeNSIYa (14 fevral, 20:15)
Ramos, Marselo, Militao, Valverde, Odriosola, Azar, Rodrigo, Karvaxal – bu «Real» tarkibidagi jarohatlanganlar ro‘yxati. Zidanning yozg‘irganicha bor, bu holatda madridliklarni tanqid qilish tugul, ikkinchi o‘rinda yurgani uchun olqishlash ham kerak. Murabbiy hatto so‘nggi o‘yinda hech qachon murojaat qilmagani 3-4-3 sxemasida ham o‘ynab ko‘rdi, hammasi ijrochilarning yetishmovchiligidan. «Valensiya»da ham o‘ziga yarasha muammolar bor. Cherishev, Mangalya va Diakabi jarohatlangan.
«Real»ku katta ambitsiyalari va yulduzli tarkibi bilan endi shunday holatga tushib turibdi, «Valensiya» esa allaqachon shu rejimda yashashga o‘rganib qolgan. Jamoa transferlar oynasida bir qator yetakchi futbolchilarni boy berdi, shunday bo‘lsa-da, ayniqsa, oxirgi turlarda ancha yaxshi natijalar qayd etmoqda. Kubokda «Sevilya»dan, chempionatda «Atletiko»dan mag‘lubiyatlarni to‘g‘ri tushunsa bo‘ladi, so‘nggi 9 o‘yinda qolgan 7tasida mag‘lubiyatga uchramaslikning uddasidan chiqishdi. Ammo «Valensiya» hali ham tepaga emas, pastga qarashga majbur – jamoa bilan xavfli zonani atigi 4 ochko ajratib turibdi, xolos. 34 yillik La Liga mavsumidan so‘ng, quyi ligaga tushish, qay sharoitda bo‘lsa ham «Valensiya»ga yarashmasa kerak.
Ayniqsa, aynan grandlarga qarshi «Valensiya» afishaning hurmatini qiladi. Benzema hisobni ochgan o‘yinda Soler uchta penaltini aniq amalga oshirgan va Varanning avtogoli bilan qo‘shilib, 4:1 hisobida mezbonlar ustun kelgandi.
«Real» o‘sha o‘yin uchun qasd olishdan tashqari, «Atletiko»ni quvishda davom etishi kerak. To‘g‘ri, farq ancha katta (5 ochko va «Atletiko»da ikki zaxira o‘yin bor), ammo o‘tgan turda «Atletiko» «Selta» bilan 2:2 o‘ynadi va 9 o‘yindan iborat g‘alabali seriyaga chek qo‘ydi. Bu durang ham bekorga sodir bo‘lmadi, hozirda «Atletiko» safida virusga chalinganlar bor – Felish va Lemarning yo‘qligi o‘yinga ta'sir qilishi turgan gap. Xullas, «Atletiko»ga pastdan turib bosim o‘tkazish va Ispaniyaga intrigani qaytarishning ayni vaqti.
ARSeNAL – LIDS YuNAYTeD (14 fevral, 21:30)
Bir paytlar turnir jadvali yuqorisida qo‘shni bo‘lib yuradigan bu jamoalar hozir ham yonma-yon turibdi, ammo yuqoriga ancha bor. «Lids» 32 ochko bilan o‘ninchi, «Arsenal»da bir o‘yin zaxirada va bir ochko kam – o‘n birinchi. Agar raqiblarning asr boshlaridagi to‘qnashuvlarini xotirlasangiz, to‘pni nazorat qilayotgan «Arsenal» va tezkor «Lids» xayolingizga keltirishingiz mumkin edi, afsuski endi bu ham o‘zgargan. Arteta o‘z o‘rnida qolishi uchun ochko kerak bo‘lgan sari, ancha pragmatik va ehtiyotkor o‘ynashga majbur bo‘lsa, «Lids»ni chempionatning eng quvnoq jamoasi deyish mumkin. 5:0, 2:6, 4:3, 3:4 kabi hisoblar aynan Belsa jamoasi ishtirokidagi o‘yinlarda qayd etilgan va bugungi «Lids» o‘rtamiyona bo‘lishiga qaramasdan faqat «kuchli to‘rtlik» jamoalaridan kam gol urgan, xolos. Boshqa tarafdan faqat ikki jamoa «Lids»dan ko‘ra ko‘proq gol o‘tkazib yuborgan, xolos. Xullas, agar «Arsenal» o‘ta ehtiyotkorlikni yig‘ishtirib, futbol o‘ynashni istasa, biz juda qiziqarli va gollarga boy to‘qnashuvga guvoh bo‘lamiz.
«Lids» so‘nggi turlarda ancha kuchli o‘yin ko‘rsatyapti va so‘nggi 4 o‘yinning 3tasida g‘alaba qozondi. Ayniqsa, «Lester» ustidan safarda qozonilgan g‘alaba ancha ishonchli chiqdi. «Arsenal» esa aksincha, qatorasiga 6 g‘alabadan keyingi 5 o‘yinda faqat «Sauthempton»ni mag‘lub etdi, xolos. «Vulverhempton»dagi mag‘lubiyat mayli, qizil kartochka barchasiga burilish yasaganini tan olsak, «Aston Villa» ko‘p jabhada «Arsenal»dan ustunlik qilgandi.
Taqvim nuqtayi nazaridan bu o‘yinda ochkolar qo‘lga kiritish ayniqsa, «Arsenal» uchun juda muhim. Chunki, keyingi turda londonliklar «Manchester Siti»ni qabul qiladi. Undan keyin «Lester» maydoniga safar, o‘rtada «Byornli»ga qarshi nisbatan oson o‘yindan keyin yana «Tottenhem», «Vest Hem» va «Liverpul» kutib turibdi. Ya'ni keyingi bir oyda Yevropa Ligasidagi «Benfika»dan tashqari, Arteta shogirdlari 4ta katta o‘yinda maydonga tushadi. O‘sha o‘yinlarda ishonchli harakat qilish, hech bo‘lmasa, durangga rozi bo‘lish uchun «Lids» va «Byornli» kabi raqiblar mag‘lub etilishi shart bo‘ladi.
Darvoqe, Lidsda o‘tgan birinchi davra uchrashuvida hisob ochilmagandi. O‘shanda mehmonlar yarimhimoyachisi Pepe 51-daqiqada qizil kartochka olgan, lekin «Lids» g‘alaba qozona olmagan. Ammo Belsa shogirdlari butun o‘yin davomida «Arsenal» darvozasi tomon 25 marta zarba berishgandi.
