18:04 / 26.02.2021
5566
Барча аёлларга ҳам жамиятда ўрнини топиши учун муносиб шароит яратиб берилмаган – президент хотин-қизлар муаммолари ҳақида

Аёлларни хўрлаш, ўзини-ўзи ўлдириш даражасига етказиш оддий ҳолга айланиши оқибатида Ўзбекистонда 2020 йили 15 мингга яқин аёл зўравонликдан жабр кўрган. Бу ҳақда президент Шавкат Мирзиёев аёллар ва қизларнинг муаммоларини ҳал қилиш ва уларни ҳар томонлама қўллаб-қувватлаш масаласига бағишланган видеоселекторда маълум қилди.

Йиғилишда президент Ўзбекистонда «маҳаллабай» тизимни, ёшлар ва аёллар дафтарлари қандай ишлашини тушунмаган раҳбар энди ишлай олмаслигини маълум қилди.

«Халқимизнинг қарийб ярмини, яъни 17 миллионга яқин аҳолини хотин-қизлар ташкил этмоқда. Лекин барча аёлларга ҳам жамиятда ўрнини топиши учун муносиб шароит, имконият яратиб бера оляпмиз-ми? Афсуски, йўқ.

Ўтган икки йилда 116 мингга яқин аёллар ўз тадбиркорлик фаолиятини тўхтатган. Қишлоқ жойларида, олис ва чекка ҳудудларда истиқомат қилаётган хотин-қизларга кўрсатилаётган тиббий хизматлар сифати талаб даражасида эмас. Масалан, мамлакатимизда ҳар йили 3,5 мингдан ортиқ аёллар кўкрак бези саратони, 1,5 мингга яқин хотин-қизлар аёлларга хос касалликларидан вафот этмоқда», дея президентнинг сўзларини келтирмоқда Kun.uz мухбири.

Давлат раҳбари ажримлар сони ҳам юқорилигича қолаётганига тўхталган.

«Ўтган 2020 йили республикада ажримлар сони 28 мингдан ортган. Қашқадарёда – 2 минг, Хоразмда – 1,1 минг, биргина Ромитан туманида – 110та ажрим қайд этилган. Эр-хотин ўртасидаги доимий жанжал, хиёнат, куч ишлатиш ва миграция ажримларнинг 70 фоизига сабаб бўлмоқда.

Энг ачинарлиси, аёлларни хўрлаш, ўзини-ўзи ўлдириш даражасига етказиш ҳамда омма олдида «сазойи» қилиш ҳолатлари оддий ҳолатга айланиб бормоқда. Ўтган йили 15 мингга яқин хотин-қизлар тазйиқ ва зўравонликдан жабр кўрган.

Шу билан бирга, ўтган йилларда 480 мингга яқин хотин-қизлар узоқ муддатга хорижга ишлаш учун кетган бўлиб, ҳозирда уларнинг фарзандларига оид маълумотлар ҳеч қайси идорада мавжуд эмас», дейди давлат раҳбари.

Top